Mexicomi anngunniunneq
USAp Akutaaneq unammissanngilaa
Assammik arsartartut GOG-mut isumaqatigiissut malinniarpaa taamalu tallimanngornermi USA-mut unamminermi Akutaaneq Kreutzmann peqataatinnagu
Assammik arsarnermi kalaallit unammisartuini ligamilu unammisartuni GOG-mi pingaarutilittut unammisartut Akutaaneq Kreutzmann tallimanngornermi qasuersaassaaq. Sisamanngornermi Mexicomiit timmisartoq inortorpaa tallimanngornermilu USA-mut unamminermi peqataassanngilaq naak suli panamerikamiut pissartanngorniunnissaannut anngunngiuffiusumi Mexico City-miikkaluarluni.
Arfininngornermi GOGp ligami kingullerpaajusunut TMS Ringstedimut unamminissamini Akutaaneq Kreutzmann amigaatigissavaa. GOG aamma kalaallit unammisartui isumaqatigiissimagaluarput arfininngornermi TMS Ringstedimut unamminissamut Akutaaneq Kreutzmann piareersimassasoq.
Ajoqusertinnaversaarpaat
Periarfissarli tamanna sisamanngornermi qatagiinnarpoq timmisartumut billetissaqarfigisaminut ilaanngitsoorami. Hollandimiut timmisartuutileqatigiit KLM-ip Akutaaneq Kreutzmannip ikinissamut uppernarsaatissaa anillatsinnaveerpaat allatullu ajornartumik kalaaleq unammisartoq qimallugu timmisartoq Europap tungaanut aallaannarpoq
Assammik arsartartut kattuffiat GHF aamma GOG isumaqatigiissimapput Akutaaneq Kreutzmann unamminerni pingasuni nunarput sinnerlugu Mexicomi unammissasoq. Taamaammat tallimanngornermi unnukkut USA-mut unamminermi peqataassanngilaq.
- Aamma eqqarsaatigisariaqarpoq unammersuarnerni GOG arlaleriarluni suli unammisussaammat taassumalu USA-mut unamminermi ajoquseratarsinnaanera GHFip mianersorfigaa taamalu GOG-mut isumaqatigiissut ataqqillugu unammeqataatissanagu, Nunatta sungiusaasua Niels Møller nalunaarpoq.