USA: Kiassuaq avataaniittoq inuunernik amerlasuunik naleqartitsisoq
USA-p annerpaartaani maanna sapaatip akunnerata naanerani kiassuseq qaffasingaarmat oqartussat naapertorlugit ulorianarsinnaavoq.
Danmarkip nalunaaqutaa malillugu sapaammi ullaakkut kiassuaq minnerpaamik inuit arfinillit inuunerannik naleqartitsisimavoq. Amerikamiut tusagassiorfiat CBS News taama allappoq.
Illoqarfissuarni soorlu New Yorkimi, Philadelphiami Washingtonimilu kiassuseq 40 gradit qanilleqqavaat.
Inuit 150 millioningajaat kiassuarmik eqqorteqqapput, kiassuaq kitaata qeqqaniit Atlantikup avataanut isorartussusilimmiippoq.
USA-mi Naalagaaffiup Silasiortarfia (NWS) naapertorlugu kiassutsip 46 gradit angusinnaavai, ingammik USA-p kangiani.
”Kiassuseq taama qaffasitsigisoq isugutarujunneralu ulorianarsinnaavoq, tassa qanoq iliornissamut piareersarsimanngikkaanni kiassuaq inuuserlertitsisinnaammat”, taama navianarneranut silasiorfik mianersoqqusivoq.
Sapaammi kingusissukkut tungaanut kiarujunnissaa ilimagineqarpoq, naqitsinertuffimmi Atlantikup avataaniit silaannarmik kiattumik nassarluni aggermat.
Oqartussat inuit imertorluarnissaannik, napparsimasut utoqqaallu immikkut nakkutigeqqullugit oqaaqqissaaripput. Aammattaaq inuit ajornanngippat isersimaannarnissaannut meeqqallu aamma uumasut biilini qimanneqannginnissaannik oqaaqqissaaripput.
Kiassuaq maannamut minnerpaamik inuit arfinillit inuunerannik naleqartitsivoq, tamatumunnga ilanngullugu sapaatip akunnerata aallartilaarnerani Marylandip kangiani inuit marluk inuunitik annaavaat.
NFL-imi arsartartuunikoq Mitch Petrus sisamanngormat toquvoq. Inuuniutigalugu arsartartuunikoq 32-nik ukiulik ilaquttami pisiniarfiutaata silataani sulitilluni kiassuarmik eqqugaalluni toquvoq.
Amerikamiut tusagassiorfii arlallit naapertorlugit Pulaski Countymi nakorsaq toqusunik misissuisartoq taama ilisimatitsivoq.
New Yorkimi borgemesteri Bill de Blasio kiassuup malitsigisaanik ajornartoorfittut nalunaaruteqarpoq, oqartussallu sapaatip akunnerata naanerani aaqqissuussat arlallit taamaatissimavat.
Taakkununnga ilanngullugit Central Parkimi festivali OZY fest, tassani nipilersortartoq John Legend, arsartartoq tusaamasaq Megan Rapinoe aamma “The Daily Show”-imi aallakaatitsinermi ingerlatsisoq Trevor Noah aliikkusersuisussaagaluarput.
Times Squaremittaaq aaqqissuussaq 1969-imi qaammammut minneq pillugu eqqaassutissaq taamaatinneqarsimavoq. Sapaammilu ingerlanneqartussaagaluaq New York City Triathlon taamaatinneqarluni.
Aaqqissuussisut naapertorlugit inuit 4000-t peqataasussaasimagaluartut akiliutaat utertinneqassapput.
Aammattaaq National of Artimi Washingtonimi silami jazzimik tusarnaartitsineq taamaatinneqarpoq.
Nuna sanilerisaat Canada aamma kiammik eqqugaavoq. Tassani oqartussat Canadap kangiani kianneranik mianersoqqusisimapput.