USA: Issittoq pillugu politikkerput imaappoq

Amerikamiut nunanut allanut ministeriata Múte B. Egedellu ullumi Kangerlussuarmi ataatsimeeqatigiinnissaat sioqqullugu, Amerikamiut Nuummi konsuuleqarfiata USA-p Issittoq, Issittumi Siunnersuisoqatigiit taakkulu silap pissusaanut atatillugu pingaarnerutitaat pillugit politikkimini pingaarnerutitani nassiussimavai.'

Allattorsimaffimmik 14-inik immikkoortortaqartumik takussutissiinermi siunertarineqarpoq, USA-p præsident Joe Bidenimik siuttoqarluni, naalagaaffiit pissaanilissut sillimaniarnermut politikkiminni Issittumik qitiutitsilersimanerannut atatillugu qanoq iliuuseqarsinnaanermut ilisimasamik annertusaanissaq.

Pineqartut 14-it sammisanut pingasunut avillugit:

USA-p Issittumut politikkia

# USA-mit takorloorneqarpoq, Issittoq aaqqiagiinngiffiunngitsoq, naalagaaffiit akisussaasseqartumik iliuuseqartussanngorlugit inatsisinit aqunneqartoq, aningaasaqarnikkut ineriartortoq aamma nunat inoqqaavisa avatangiisiinik soqutigisaannillu aamma kulturiannik ataqqinnilluni attanneqarsinnaasumik isertuussinngittumillu aningaasaliiissuteqartoqartartoq.

# Silap pissusaata allanngoriartornerata malitsigisaanik Issittoq tikikkuminarnerulertussaammat, Amerikamiut soqutigisarpassui pingaartillugit qaffasissumik isumaqatiginninniartarnerup ingerlaannarnissaata nukittorsarneqarnissaatalu pisariaqartinneqarnera takusinnaavarut, Amerikamiut soqutigisaannut ilaapput: silap pissusaa, ilisimatuussutsikkut suleqatigiinneq, isumannaassuseq, aningaasaqarnikkut ineriartorneq nunallu inoqqaavisa pisariaqartitaat.

# Issittoq eqqissisimasumik suleqatigiiffiusimavoq. Naalakkersuinikkut ajunngilluinnartumik ingerlatsiffiusimalluni, naalagaaffiit innuttanut pisussaaffii malinneqartarlutik aamma malittarisassat erseqqissut malillugit issittumi naalagaaffiit sumiiffinni imaatigut isumalluutinik silaannarmillu nakkutiginnillutik, taakkununnga ilanngullugu imaap naqqanik ingerlatsisarput. Issittumi naalagaaffiit malittarisassanik taakkuninnga malinnittarsimapput, malittarisassat pineqartut Issittumi sillimareertarnermut patajaassusermullu tunngaviusimallutik.

# Issittumi sumiiffinnilu allani nunat tamalaat malittarisassaat, tunngaviit suliffeqarfiillu attanneqarnissaat ingerlatiinnassavavut isumaqatigiissutivullu nutarsarlugit. Angunakkavut taakku nunami namminermi nutarsaanitsinnut ilanngunniarpavut, issittumi naalagaaffik Alaska ilanngullugu. Periusissiatsinni immikkoortut pingaarutillit taakku Issittup nunanit tamalaani suleqatigiiffiusup eqqissisimaffiujusarnissaa qulakkeerinniffigissavaat.

Issittumi Siunnersuisoqatigiit

# Issittumi Siunnersuisoqatigiit ukiuni 25-ni atuutingajalersoq Issittup patajaattuunerani qitiulluinnarput. USA-mit nunat tamalaat nukittuumik suleqatigiinnerat, Issittumi Siunnersuisoqatigiinnit oqinnerulersitsisartoq pingaartilluinnarparput.

# Issittumi Siunnersuisoqatigiinni ministerit Reykjavikkimi Islandimiittumi maajip 19-iani 20-anilu ataatsimiinnerat periarfissiivoq, Issittumi naalakkersuinikkut ingerlatsineq assersuutigalugulu silap pissusaata allanngoriartornerani suliassat suussusersineqarnissaat pillugit apeqqutinik suliaqarnissamut issittumi pingaarnertut oqallittarfimmi Siunnersuisoqatigiit sulisarnerat nukittorsarniarlugu Siunnersuisoqatigiit pingaarutilimmik suliaqartarnerisa erseqqissaaffigineqarnissaanut.

# Issittumi Siunnersuisoqatigiit aqqutigalugit suleqatigiittarnerup periarfissippaatigut, issittumi - avatangiisitigut, inuttut, aningaasaqarnikkut politikkikkullu - unammilligassatsinnik ataatsimoorluta isumaginnillutalu qaangiiniarnissatsinnut, tassa suliassavut tigussaasumik siuarsarsinnaalerniarlugit aamma oqaatsivut iliuutsivullu aqqutigalugit suleqatigiinnermi siunertarineqartumik takutitsinissatsinnut.

# Naalagaaffiit peqatigiit pisussaapput, Issittumi Siunnersuisoqatigiit aqqutigalugit Siunnersuisoqatigiit suliassarpassuinik assigiinngitsunik siuarsaallutik suliaqarnissamut. Issittumi aningaasaqarnikkut attanneqarsinnaasumik ineriartortitsineq, aamma avatangiisinik illersuinissamut ataatsimoorlunilu silap allanngoriartornera pillugu anguaniakkanut naleqqusagaasoq siuarsarniarlugu suleqatigiippugut.

# USA taamaalilluni pisussaavoq, Issittumi najugallit, taakkununnga ilanngullugit Issittumi nunat inoqqaavi suliani taakku siunissaaannut sunniuteqartussani oqaasissaqartitsinerunissamut.

Issittumi silap pissusai salliutinneqassasut

# Præsidentip Bidenip silap pissusaata allanngoriartornerata malitsigisaanik unammilligassarpassuit annertuut Issittumi naalagaaffinnut sunniuteqartut isumagineqarnissaannut USA suliaqaqqusimavaa. Silap pissusaa allanngoriartormat sineriaat neriorneqarnerisigut nunallu qeriuaannartup aakkiartorneratigut innuttaasut eqqugaasimapput. Issittumi naalagaaffiit allat silap pissusaata allanngoriartorneranik akiuinissamut imminnut pisussaaffilersimasut suleqatiginiarpavut, tassa Siunnersuisoqatigiinni silamut tunngatillugu suliassat salliutinniarlugit, tassunga ilanngullugu paamik metanimillu aniasoqarnera pakkersimaarniarlugu Siunnersuisoqatigiinni ataatsimoorluta suliaqarnerput nukittorsaqqinniarlugu.

# Nunarsuarmi silap agguaqatigiissillugu kissakkiartorneranit pingasoriaammik Issittoq kissakkiartorpoq. Taamatut kissakkiartortoqarnerata Issittoq suli kissakkiartornerutippaa. Imaani sikup qinngornermik utertitsisarunnaarnera aamma nunap qeriuaannartup aakkiartorneratigut metanip (silaannarmi gassit kiatsitsisut) anianera tamatumunnga assersuutissaapput. Issittumi taamatut annertuumik allanngoriartortoqarnera nunarsuup sinneranut annertuumik kinguneqartussaavoq. Assersuutigalugu sermit aakkiartornerisigut nunarsuarmi imartat qaffareernikuupput, sinerianni najugaqarfiit qarsutsiffigineqarsinnaanerat annertunerulernikuuvoq aamma naalagaaffiit qeqertaasut ulorianartorsiortinneqarlutik.

# Issittoq paat anianerannut, apummik sikumillu qernertunngortitsisarlunilu aatsitsisartumut immikkut malussarissuuvoq. Issittumi Issittullu avataani sumiiffinnit allani kulstoffip anianeranik annikillisitsineq Issittumi sukkasuumik kissakiartorneq issittumilu najuaqartunut tamatuma sunniuteqartarnera unikaallatsissavaa.

# Paat anianerannik annikilliliiniarluni suliaqarneq iluatsinneqassappat, Issittup avinngarussimasortaani inuiaqatigiit peqqissusaat pitsaanerulersinneqassaaq, pingaartumik najukkani innaallagissiornermi dieselmotoorinik pinngitsuisinnaanngitsut eqqarsaatigalugit.

# Issittumi silap pissusaata allanngoriartornerata malitsigisaanik aningaasartuutaasussanik ulorianarsinnaasunillu paasinninnissarput itisilerniarlugu aamma nunarsuarmi gassit silaannarmik kiannerulersitsisartut anianerat sukkanerusumik annikillisinneqarnerisigut sunniutissat avammut nalunaarutiginiarlugit Issittumi Siunnersuisoqatigiit suliaqarnerat Naalagaaffiit peqatigiit tapersersussavaat.