USA: Inuit arfineq-pingasut issimi toqusut
USA-mi sumiiffinni arlalinni Issisiut -30 gradinut apparpoq. Tamanna maannamut inuit arfineq-pingasut inuunerannik naleqartitsivoq.
Amerikami naalagaaffiit naalagaaffeqatigiinni ilaasuni arlalinni ulluni kingullerni nillerterujussuarmpoq, illoqarfiillu arlallit isseqaat.
USA-mi silap ingasattup inuit millionerpassuit ulluinnaat unikkallartippai, allakkerisut anusinngujuitsut allaat tunniutiinnartariaqarlutik.
Allakkerisartut sila qanoq ikkaluaraangalluunniit sulinermik ilisarisimaneqartut, sila pissutigalugu isersimaannartariaqarput.
Naalagaaffeqarfinni arlalinni inuttaasut isersimaannarnissaamut kaammattorneqarput, tassani aamma atuarfiit suliffeqarfiillu pingasunngornermi matoqqapput.
Chicagomi pingasunngormat ullaakkut 30 gradinik issippoq, kisianni anori pissutigalugu 50-nik issittutut misinnarpoq. Illoqarfiup timmisartoqarfissuinit marlunnit timmisartut 1500-nit amerlanerit taamaatiinnarneqarput.
Issinnera issittumit anorit malitsigisaanik pivoq.
- Issittumit silaannaq ulluni marlunni tulliuttuni USA-p qeqqani aamma kangianiiginnassaaq, nuna tamakkerlugu silasiorfik taama nalunaaruteqarpoq.
Tamanna ulluni allalinni 30-nik isseqartitsisinnaavoq, imaluunniit issinnerusinnaavoq, silasiorfik nalunaarpoq.
Silap issinnera inuunermut ulorianartorsiortitsisinnaasoq oqartussat mianersoqqussutigaat. Minutsit arlaqanngitsut ingerlanerini qiusoqarsinnaallunilu qerunneqalertoqarsinnaasoq oqaatigineqarpoq.
Associated Pressip nalunaarutaa naapertorlugu inuit arfineq-pingasut issinneranit toqusimapput.
Kialaaffiit innuttaasunut atugarliortunut, assersuutigalugu utoqqarnermut aamma angerlarsimaffeqanngitsunut unnuisitsinerit annertusisimavaat. Chigacomi innuttaasut 16.000-it missaanniittut angerlarsimaffeqanngitsut ilimagineqarpoq.
Sapaatiuppat silap kiassusaa 40 gradit missaannik qaffariarnissaa naatsorsuutigineqarpoq, qulinik kiassalluni.