USA pappialatigut assortuuttoqarnerani ajugaasoq

Kalaallit Nunaat Mexicomi nunarsuarmi pissartanngorniunnissamut anngunniuttoqarnerani peqataasussaangaluarpoq. Anngunniunnissarli corona pissutigalugu taamaatiinnarneqarsimavoq. Anngunniunnissaq Puertoq Ricomi ingerlanneqartussanngorlugu aajangerneraluaq aamma taamaatiinnarneqarsimalluni.

Kalaallit Nunaat qaffasinnerusumik inissisimangaluartoq aamma anngunniunnerpassuarni pisarsimasuni USA-mit angusarinnerusaraluartoq allaffissornikkut aalajangerneqarsimavoq, pissartanngorniunnermi USA peqataassasoq.

Kanngunartuliaq aalajangiinermut atatillugu oqaatsit atorneqarsimasut ilagaat. Kalaallit Nunaanni naammagittaalliortoqanngilaq. Nunani tamalaani assammik arsaattartut kattuffiat IHF pissaanneqarluartoq oqaaseqarsimavoq.

Soorunami aalajangiinermut pingaaruteqarsimaqaaaq assammik arsartartoqarnera 300 millioninik amerlassuseqarsinnaasunik. USA-mi inuussutissarsiutigalugu assammik arsartartoqalernissaanik sulissuteqartoqarlunilu timersortarneq ileqquuvoq aamma pikkorilluinnartunik timersortartoqarpoq.

Assammik arsartuni atorneqarsinnaanerannik takorluuinermut iluaqutaasinnaasut. 2028-mi aamma USA-mi olympiadertoqssaaq, tamannalu aamma aalajangiinermut pissutaaqataasimassalluni.

Kalaallit Nunaat pingasoriarluni nunarsuarmi pissartanngorniunnermut peqataasimav oq. 2001-imi, 2003-mi 2007-imilu. Maanna ukiut marluk qaangiuppata anngunniunnissamut aatsaat periarfissaqaqqilissaaq.

Marloqiusamik naalagaaffimmut innuttaassuseqarneq

IHF aalajangermat USA VM-imut peqataassasoq, amerikami kattuffik nunanullu allanut unammisartut sungiusaasuat svenskiusoq Robert Hedin ulappusersimapput. Amerikami assammik arsartartut sumiiffinnit assigiinngitsuneersut qanoq pisinnaasaqartiginertik videoliareriarlugu nassiutissagaat kaammattorneqarput. Piumasaqaataalluni Aerikap naalagaaffiani innuttaassuseqarnissaq aamma assammik arsarsinnaassuseqarnissaq. Kattuffmmit assammik arsartartut 20-t toqqarneqarsimapput. Ataaseq USA-mi klubbimi arsartartoq. Ataaseq Tunisiami arsartartoq. Marluk Danmarkimi arsartartut.

Toqqarneqartut sinnerit Europami klubbini pitsaanerni pitsaanerilluunniit tulliini arsartartuupput. USA pissartanngorniuttoqarnerani Norgemut, Østrigimut Frankrigimullu unammissaaq. Unammsisut isiginnaarlugit eqqarsaatigalugulu gruppi E-mi Kalaallit Nunaat unammeqataasinnaagaluartoq eqqumiissaaq.

Ilaasortat ikiliartornerat ernumanartoq

Assammik arsartartup, Nykøbingg Falster Håndbolgimilu sungiusaasup Jakob Larsenip, nunami nunanilu tamalaani assammik arsaattarnermik ilisimasaqarluartup Kalaallit Nunaanni assammik arsartarnerup ineriartornera ernumanartoqarnerarpaa. Jakob Larsen unammisartutut Kalaallit Nunaat nunarsuarmi pingasoriarluni pissartanngorniuteqataaneranut peqataasarsimaavoq. Jakob Larsen uatsinnut ilaatigut oqarpoq:

- Kalaallit Nunaanni klubbini ilaasortat ikiliartorput. Tamanna assut ajuusaarnarpoq. Danmarkimi klubbit ilaasa tamanna aamma siusinnerusukkut misigisarsimavaat. Ingerlatsineq tamatigut imminut ataqatigiittussaavoq.

- Aamma ernumanartuuvoq, Minik Dahl Høeghip kisimi Danmarkimi angutit assammik arsartartut pitsaanersaanni Lykke Frank Hansenilu uagutsinni Nykøbingimi kisimi arsartartuunerat. Taakku ataqqinaraluarlutik, marluullutik unammisartututut utoqqaliarsaalernikuupput. Minik Dahl Høeghitut ittunik imaluunniit qatanngutigiit Kreutzmannikkutut ittunik nutaanik soqanngilaq. Kalaallit Nunaannit immaqa siunissami assammik arsartartunik danskit klubbiini ulluinnarni arsartartunik killilersuisoqarpallaartoqarunnaartuuguni. Assersuutigalugu nunanut allanut unammisartut aallartilluartinniarlugit danskimik ataatsimik marlunnilluunniit kalaallimik aanaalinnik atuisarnissaq eqqarsaatigineqarsinnaavoq. Amerikamiut tassa marloqiusamik naalagaaffimmut innuttaassuseqartitsineq taamatut atortarpaat.

-Nykøbingimi assammik arsartartut Kalaallit Nunaanneersut ukiarli unammisorisarpavut. Arnanik U19-imi unammisartussanik amigaateqarpugut. Kalaallit Nunaanni assammik arsartartut ineriartortinneqarnerannut peqataarusuppugut. Suliniutip ingerlanneqarneranit misilittakkavut pitsaasortaqarlutillu pitsaanngitsortaqarput. Coronap qaammatini pingasuni-sisamani atuunnera sivikippoq. Tamannami anguneqassappat piffissarujussuaq atorlugu sulisoqartariaqarpoq.

Sungiusarneq, sungiusarneq aammalu sungiusarneq

- Erseqqissaatigineqassaaq pitsaanerpaanut ilanngunniaraani tamanna allaqqunneqarsinnaanngitsoq. Sungiusartoqartariaqarpoq. Qasujaallisarneq nukittorsarnerlu pingaaruteqaqaat, unammeriaaserlu ineriartortinneqartuartussaavoq. Norskit Europami pissartanngoqqammerput, arnallu 14-inik ukioqarallaramilli siunnerfeqarlutik sungiusartarsimasut qularnanngilluinnarpoq. Soorunami aamma isumatusaarlutik inuunerminnik atugaqarlutillu nerisarsimapput. Norskit assammik arsallaqqissuupput.

Eqqaamaneqassaaq meeqqanik inuusuttunillu sungiusaaneq imaannaanngitsuummat. Sungiusaaneq piginnaasaqalersitsisassaaq, taamaanngippat ilaasortaajunnaartut amerlissapput. Kinaluunniit nuanninngitsumik sungiusarusunnavianngilaq. Kalaallit Nunaanni assammik arsarsinnaasorpassuaqarpoq. Imaassinnaavoq angajoqqaaqartoq ataatsimoorlutik suliassamik kivitsisinnaasunik. Tamanna Kalaallit Nunaanni kisimi atuutinngilaq. Danmarkimi ajornartorsiut tamannarpiaq aamma atuuppoq, Jakob Larsen oqarpoq.

Piumassuseqarluarlutik iliuuseqartartut amigaataasut

- Piumassuseqarluarlutik iliuuseqartartut, ukiut tredivit matuma siorna Nuummi misigisaqarfigilluarsimasakka eqqarsaatigisarpakka. NUK-p inuusuttaanni assammik arsartartuulluta John Jakobsen sungiusaasoraarput. Nukittorsarluta sungiusartarpugut. Kalaallillu Nunaanni pissartanngorniunnermi kuultinnattaavut tulluussimaarutigisarlugit. GSS Ritamik aamma Kristian Heilmannimik sungiusaasoqaramik assorsuaq iluatsitisimapput.

Ullutsinni nutaaliaasuni pitsaasumik pitsaanngitsumillu inuuffigisatinni taamatut ittut sumiiffippassuarni amigaatigineqarput. Tamatumali inuiaqatigiittut akisussaaffeqarnermut takutiinnarpaa. Nunanut allanut unammisartussavut meeraanerminni inuusuttuunerminnilu pitsaalluinnartunik atugassaqartinneqarlutillu periarfissaqartinneqassapput, Jakob Larsen coronap tuniluuffiani Europami sungiusaasutut qaffasinnerpaamik sungiusaasutut ilinniarfimmi, EHF Master Class-imi angusisimasoq, Nykøbing Faster Håndboldimilu sungiusaasutut ukiunut marlunnut tulliuttunut isumaqatigiissummik sivitsuisimasoq naggasiivoq. Susassaqartut taakku marluullutik 2023-mi aasap tungaanut atuuttussamik isumaqatigiissuteqarput.