USA-p nunanut allanut ministeria Nuummukassaaq
Amerikamiut nunanut allanut ministeriat Mike Pompeo sapaatip-akunnerata tulliani Nuummukassaaq, tassani ilaatigut Nalaakkersuisut siulittaasuat Kim Kielsen ataatsimeeqatigissavaa.
Issittumi Siunnersuisoqatigiit Finlandimi Rovaniemi sapaatip-akunnerata tulliani ataatsimiinnerannit angerlarnermini, Nuuk aqqusaarniarlugu aalajangersimavoq. Taanna sisamanngorpat maajip 9-anni ullaap tungaani Hercules C-130-imik timmisartumik tikinnissaa naatsorsuutigineqarpoq.
Nunanut allanut ministerit sisamassaat
Amerikamiut nunanut allanut ministeriisa Kalaallit Nunaannut tikittut sisamassaat. Siornatigut Colin Powell, Hillary Clinton aamma John Kerry nunarsuarmi qeqertata annersaannut aqqusaarnikuupput.
2016-imi juunip naanerani sila pillugu Ilulissat-Nalunaarut oqaluuserineqarpoq, maannalu Issittumi sillimaniarneq pillugu politikkip amerikamiut nunanut allanut ministeriata Kalaallit Nunaannut tikeraarneranut pissutaarpasippoq.
Mike Pompeop tikeraarnerani amerikamiut nunanut allanut ministeriannik Kim Kielsen aappassaanik naapitsinissamut periarfissaqarpoq. Kingullermik John Kerry Ilulissani naapippaa.
Program
Mike Pompeop Nuutoqqami Hans Egede illuani Kim Kielsen ataatsimeeqatigissavaa. Tamatuma kingorna Nunanut allanut naalakkersuisoq Ane Lone Bagger kiisalu danskit nunanut allanut ministeriat Anders Samuelsen ataatsimeeqatigissavai.
Mike Pompeo marsimili 2018-imi USA-mi nunanut allanut ministerinngorpoq. Pompeo siornatigut CIA-mi pisortaanikuuvoq, Korea Avannarlermilu isumaqatiginniniarnernut qitiusuusimalluni.
Sillimaniarneq pillugu politikkimi misissueqqissaarnerni arlalinni Issittumi sillimaniarnikkut politikkikkut ernumassuteqarlutik oqariartuutigisarpaat, Ruslandip sakkussiornera pissutigalugu.
Mittarfinnut aningaasaliinerit
Amerikamiut illersornissamut ministeriata ukiaq nalunaarutigaa, amerikamiut illersornissaqarfiat mittarfinnut sakkutuujunngitsunut aamma sakkutuunut atorneqartussamut aningaasaliinissamut piareersmasoq. Taamanernilli pisoqaqqinngilaq, USA-p Kalaallit Nunaanni sakkutooqarnikkut qanoq eqqarsaateqarnersoq pillugu Mike Pompeop saqqummiussaqarnissaa pissanngatigineqarluni qilanaarineqarpoq.
Pompeop Nuummut tikeraarnissaa pillugu US Department of Statemi ullumi saqqummiunneqarpoq. Issittumi Siunnersuisoqatigiit Finlandimi ataatsimiinnerisa kingorna, Europami illoqarfiit pingaarnerit Berlin aamma London tikeraassavai, tassanngaanniillu Nuummukarluni.
Amerikamiut nittartagaanni Nuummut tikeraarnerup siunertaa pillugu ima allaqqasoqarpoq:
- Nunanut allanut ministerit pingasut USA-mit, Kalaallit Nunaannit aamma Danmarkimit Issittumi ataatsimut salliutinneqartut aamma Kalaallit Nunaanni suliaqarnerup annertusineqarnissaanut periarfissat oqaluuserissavaat.
Mike Pompeop Nuummut tikeraarnermi aamma Kim Kielsenip nunanullu allanut ministerit marluk ataatsimeeqatiginerisa kingorna New York Air National Guardimeersut Kangerlussuarmi naapissavai, taakku nunani tamalaani issittumi ilisimatusarnermut pingaaruteqarluinnartumik inissisimapput, amerikamiut nittartagaanni tamanna oqaatigineqarpoq.