Skip to main content

USA-p konsulia nutaaq

Sung Choi Nuummi konsuliujunnaarpoq, kalaallilu folketingimi ilaasortaasut taassuma taartissaa ilassisimavaat.

Amerikamiut ukiut 67-it ingerlaneranni Nuummi konsuliat siulleq - Sung Choi - qaammammi matumani konsuliujunnaarpoq, taassumalu taartigissavaa Joanie Simon.

Kalaallit Nunaanni folketingimi ilaasortat marluk Aki-Matilda Høegh-Dam (S) aamma Aaja Chemnitz Larsen (IA) kalaallit politikkeriinit siullersaallutik konsulinngortoq nutaaq ilassisimavaat.

Aaja Chemnitz Larsenip Sermitsiaq:AG-mut oqaatigaa, sapaatip akunnerani kingullermi Amerikamiut konsulertaavat ataatsimeeqatigilluarsimallugu, suleqatigilernissaanullu qilanaarnerarluni.

- USA nunatsinni qitiunerusutut inissisimalersimallunilu najuunnerulersimavoq, tamatuma malitsigisaanik pissanganarluinnartunik nutaanik periarfissaqalersimavoq, pingaartumik Joint Committee aqqutigalugu, tassa inuusuttut amerlanerit assersuutigalugu USA-mi ilinniagaqarnissamut periarfissaqarput, soorlu uagut ukiuni aggersuni USA-mik niueqateqarnerorusuttugut. 

- Amerikamiullu nunatsinniinnerulernerisigut sakkutooqarnerulertoqartussaavoq, tassungalu atatillugu sakkulersortoqannginnissaanik qulakkeerinninnissaq taamalu nunatta ineriartortinneqarnissaa pillugut qanimut unneqqarissumillu oqaloqatigiittarnissaq pingaaruteqarpoq, Aaja Cheminitz Larsen oqarpoq.

Konsuliujunnaartup Sung Choip konsuleqarfiup sisamanngormat ukiumik ataasinngortorsiorneranut atatillugu allaaserisani takisooq polarconnection.org-ikkut sqqummiussimavaa.

Aallartitap tassani USA-p konsuleqarfigisimasaa siulleq Sorsunnersuup Aappaani pilersinneqarsimasoq kingumut qiviarlugu aallaaseraa aamma 2020-mi konsuleqarfiup pilerseqqinneqarnerani diplomatiskiunerusumik ingerlatsisimaneq allaaseraa.

Konsulip Kalaallit Nunaat issitumi pissusissamisoortumik diplomateqarfittut taavaa, tassungalu atatillugu oqaatigaa, Ruslandi issittortami sineriaani sakkussiornerulersimasoq aamma Kinap Issittup imartaanik atuinerunissamik anguniagaqarnera eqqaavaa.

Konsuleqarfik ulapiffiussaqisoq

- Periusissiorneq annertusineqarsimavoq, USA aamma avannaarsuani taamaaliorpoq, Sung Choi allappoq.

Sung Choiå takorloorsinnaanerarpaa, periusissiat, aningaasarsiornissaq avatangiisillu pissutigalugit Amerikamiut Nuummi konsuleqarfiat siunissami ulapiffiussasoq.

Konsulip itisiliinerulluni oqaatigaa, Kalaallit Nunaanni aatsitassat aatsitassallu qaqutigoortut tekonologimut mingutsitsinnginnerusumut pingaaruteqartut, tassani anorisaatit magnitianniit biilit innaallagiatortut batteriivinut atorneqartarmata.

Taassuma ilanngulligt Nuummi Ilulissanilu mittarfiliortoqarnera eqqaavaa, mittarfiliarineqartut Amerikamiut Kalaallit Nunaanni takornariarnerusalernissaannut periarfissiissapput, aamma USA-mi Portlandip Nuullu akornanni Reykjavikkoorluni imaatigut angallaffimmik ammaasoqarneratigut nunat taakku marluk niueqatigiissinnaanerisa aallartinneqarsinnaanerat ilanngullugu oqaatigaa.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER