USA-p kisermaassinera Issittumi siunnersuisoqatigiinni piffiit qularnarsinerannik aarlerilersitsisut

Issittumi Siunnersuisoqatigiit Finlandimi ataatsimiinneranni USA-p isumaqataajumannginnera ernumassutigineqarpoq.

Immikkoortortaq silap pissusianut tunngasoq USA-p peqataaffigiumanngilaa.

- Issittumi Siunnersuisoqatigiit siulittaasuuffiup ukiut allortarlugit nikittartup naanerani, siullermeerutaasumik atsiukkamik nalunaaruteqartoqanngilaq, tamannalu isumaqatigiinneq tunngavigalugu suliniaqatigiiffimmi ingerlasumi, siunissamut annertuumik aarlerisitsivoq, Sambo Dorough oqarpoq

- Oqaatsit uku - “silap pissusaata allanngoriartornera” - atoqqusaannginnerat misigitsaattumik pissusilersorneruvoq, Dalee Sambo Dorough, ICC-p nunani tamalaani siulittaasua oqarpoq.

- Issittumi Siunnersuisooqatigiit tutsuiginassusiat taamatut mangiarneqarmat aarleqqutigaarput, tamannalu pivoq issittumi ataatsimoorussamik isummersornissap pisariaqaleruttorfiani, Hjalmar Dahl, Kalaallit Nunaanni ICC-p siulittaasua oqarpoq. Canadami, Alaskami aamma Tjukotkami ICC-p tamanna taperserpaat.

Issittoq eqqissisimavallaanngitsoq

Ajornartorsiutit sila pillugu isumaqatigiinnginnermit annertunerusut, IA-p folketingimut ilaasortaatitaa Aaja Chemnitz Larsen isumaqarpoq.

- Issittup eqqissisimaffiuneranik isiginninnermut allannguisoqarpasippoq. USA-miit Arktisk Rådimi nalunaarutigineqarpoq Issittup eqqissisimaffiunera tamaanga killeqartoq. Russit Issittumi sakkussatigut annertusaanerat, kiisalu Kinamiut soqutiginninnerat Washingtonimi toqqissisimanngissutigineqartoq ersareqaaq. Tamannalu Kalaallit Nunaanni paasilluartariaqarparput, - sapinngisamik siusinnerpaamik, taanna oqarpoq.

- Ineriartorfiit isumakulunnartortaqartut arlaliusut takusinnaagakkit isertussanngilara.

Russit sakkussiornerat aamma kinamiut suliaqarnerat Aaja Chemnitz Larsenip sunniuteqartutut oqaatigai, Issittup eqqissisimatinneqarnera pissaanilissuit akornanni unammilleqatigiinnerulernissaannik taarserneqarsinnaasoq oqaatigalugu.

- Nutaarluinnarmik ulorianartorsiortinneqartutut ippugut, Kalaallit Nunaannilu illersornissatigut suliniuteqarnissaq annertunerusoq aalaakkaasorlu avaqqunneqarsinnaanngilaq. Aamma Kalaallit Nunaanni innuttaasut amerlanerusut illersornissaqarfimmi akuusariaqartut isumaqarpunga. Kalaallit amerlanerusut sakkutuujusinnaanermut pisinnaatitaaffimmik atuisariaqarput, illersornissaqarfimmilu suliani nunarput tamakkerlugu ingerlanneqartuni kalaallit amerlanerit akuutinneqartariaqarput.