USA-p Alaska immikkut maluginiarpaa – Ilisimatusarfimmut nutaanik periarfissaqalersitsisoq
USA-p Alaskamut ukkatarinninnini annertusivaa, taanna Issittumi pingaarutilittut suleqataassaaq. Nunap pissaanilissuup ukkatarinninnermik allannguinera Ilisimatusarfiup aamma Anchoragemi issittumi sillimaniarnermut ilisimatusarfimmik nutaamik suleqateqalernermik kinguneqarpoq.
Issittoq pillugu USA-p periusissiaa nutaaq ukiaq saqqummiunneqarpoq, taanna ukiuni qulini tulliuttuni atuutissaaq.
Periusissaq naalagaaffiup Alaskap allatut ukkatarineqarnissaanik imaqarpoq, ilaatigullu tamanna Nasiffik – Nunanut allanut sillimaniarnermullu ilisimatusarfimmut iluaqutissartaqarpoq:
- Alaska salliutinneqalerpoq.
- Issittumi sillimaniarneq pillugu ilisimatusarfimmik ammaasoqalerpoq, tamannalu Ilisimatusarfiup iluaqutigissavaa, taakku suleqatigalugit annertunerusunik suliaqarsinnaalissagatta, ilisimatusarnermut aqutsisoq, lektor Rasmus Leander Nielsen oqarpoq.
Amerikamiut ilisimatusarfiat nutaaq Anchoragemi Alaskami inissisimasoq taassuma nassuiarpaa, taannalu Nasiffiup pingaarnertut suleqatigilersinnaavaa.
Oqallinnerit Kunngeqarfimmut assingusut
USA-p illersornissamut ministereqarfia ilisimatusarfimmik pilersitsisuuvoq - The Ted Stevens Center for Arctic Security Studies. Alaskami ilisimatusarfimmik pilersitsineq periusissaq malillugu USA-mi naalagaaffiup ukkatarineqarnerata allanngorneranut ilaavoq:
- Periusissami Alaskami aqutsisut suleqatigineqarnissaat annertuumik ukkatarineqarmat nuannerpoq, taamaalilluni USA-p Issittortaaniittoq uulianut uuliaateqarfittuinneq oqaatigineqartassanngilaq, piffissap ilaani taamatut oqaatigineqartarmat, Rasmus Leander Nielsen oqarpoq.
Lekorip oqarnera naapertorlugu USA-mi oqallinnerit Kunngeqarfitsinni Danmarkip Kalaallit Nunaatalu akornanni oqallinnerit assigaat:
- Alaska naalagaaffik puigorneqarsimavoq. Pisuussuteqarfiulluni salliutinneqarsimanngilaq. Maanna Alaska naligiittut suleqataassasoq oqariartuuteqartoqalerpoq; soorlu Kunngeqarfik Danmark Kalaallit Nunaat aqqutigalugu Issittumiippoq, taava USA Alaska aqqutigalugu tassaniilluni, tamannalu pingaarnerutinniarneqalerpoq, Rasmus Leander Nielsen nassuiaavoq.
Kalaallit Nunaat pillugu nutaarsiassat annertunngitsut
- Soqutiginninneq aamma Issittumut Alaskamullu ukkatarinninneq malugineqarsinnaapput, taanna nangilluni oqarpoq.
Naak Amerikamiut periusissaanni Alaska ukkatarineqarneruleraluartoq, USA-p Kalaallit Nunaat pillugu siunertaannik nutaanik saqqummertoqarpallaanngilaq.
- Kalaallit Nunaat EU-p Issittumut periusissaani annerusumik sunniuteqarpoq, taanna ukiup ataatsip matuma siorna saqqummerpoq. Kalaallit Nunaat pillugu immikkut allaaserineqarpoq. USA ukiut tallimat matuma siornatigumut Issittumut tunngatillugu utaqqisimavoq.
- Kalaallit Nunaannut tunngatillugu Amerikamiut suniarnersut suli paasiuminaappoq, Rasmus Leander Nielsen oqarpoq.
Siunissami Russit suleqatiginissaannut ammasut
USA-p tungaanit Issittumi sakkulersornerulertoqarnissaanut tunngatillugu periusissami aamma erseqqissumik USA-p siunertaannik oqaluttuartoqanngilaq. Akerlianik kingusinnerusukkut Ruslandip Issittumi suleqatigineqalernissaanut ammasoqarnera maluginiarsimavaa.
- Ersarinngitsumik allanneqarsimavoq, kisianni Issittumi Siunnersuisoqatigiit aamma nunat tamalaat suleqatigiinnerat siunissami anguniagassatut oqaatigineqarput. Ruslandilli suleqatigineqarnerata qanoq aallarteqqissaneranik pilersaarummik allassimasoqanngilaq, Rasmus Leander Nielsen oqarpoq.