USA-p aallartitaqarfiata pisiaqarusunneq soqutaannginnerarpaa

USA Kalaallit Nunaannit salliutinneqassaaq, aallartitaq USA-p Kalaallillu Nunaata attaveqaqatigiittarnerannut akisussaasoq Sung Choi oqarpoq

Sung Choi Amerikamiut aallartitaata Carla Sandsip maajip qaammataa Kalaallit Nunaanni aallartitatut saqqummiuppaa.

Aallartitaqarfissasq suli inissivinneqanngikkaluartoq taanna Kalaallit Nunaanni angalangaatsiareersimavoq, kitaani Siorapalummiit kujataani Nanortalimmut angalasimavoq. Pisimasut DI-p Kalaallit Nunaat pillugu Københavnimi isumasioqatigiissitsinerani erseqqissaassutigivai, tassani aamma oqaatigaa Tunumut angalanissani qilanaaralugu.

Tusartikkusuttupilussuuaa USA-mit taamaallaat anguniarneqartoq Kalaallit Nunaata qanimut suleqatigineqarsinnaanera kiisalu Kalaallit Nunaanniinnermini Kalaallit Nunaat pitsaanerusumik paasisaqarfiginissaa suliassaralugu.

Telegrammi isertuussaq

Sung Choip qullersatut naalakkami Kalaallit Nunaannik pisiaqarusulluni nalunaaruteqarsimanera toqqaannartumik oqaaseqarfiginngilaa, toqqaannartumillu oqaatiginngikkaluaraa paasinarsivoq Kalaallit Nunaata naalagaaffiit 51-issaattut atuutsinneqalernissaa pilersaarutigineqanngitsoq.

Toqqortaatini misissuisimavoq, nassaaralugulu 1946-mi Nuummi taamani aallartitaqarfiup Washingtonimi naalakkersuisunut telegrammi allanut tusarliuteqqusaanngitsoq pillugu nassiussimasaa. Taamanikkut aallartitap nassuiaatigisimavaa, sorsunnersuup aappaani Danmarkimut attaveeruttoqarmat USA-mit tiguarneqarnissaq Kalaallit Nunaanni ernummatigineqarsimasoq. Aallartitalli erseqqissaatigisimavaa, Kalaallit Nunaannik illersuinissaq ikiuinissarlu taamaallaat kissaatigineqartoq nassuiaatigineqarmat ernumasuerussimasoq.

- Taamaalilluni suliaq naammassineqarpoq, tamannami aamma ullumi suli atuuppoq, Sung Choi oqarpoq.

Instagrammikkut saqqummiussiuartoq

USA-p sunik suliaqarniarnera pillugu erseqqissumik neriorsuuteqanngilaq, arlaleriarlunili erseqqissaatigaa innuttaasunik toqqaannartumik naapitsisarnissani pingaaruteqarluinnartoq. Taamatut oqarnini takutinniartuarpaa, Kalaallit Nunaanniinnermini assilisimasaminik Instagrammikkut saqqummiussisarnermigut.

- Suleqatissarsiortoqalerpat Kalaallit Nunaata USA siulliullugu toqqassagaa kissaatigaarput, aallartitaq oqarpoq.

- Nipaallisimatsiariarluni ilanngullugu oqaatigaa, soorunami danskit-kalaallillu suleqatigiinnerisa qaavisigut.

Fra Sung Chois Instagram profil
Powered by Labrador CMS