USA-mit Nuummi ataatsimiittoqarnerani peqataasoqartoq: - Issittoq isumannaatsunngortissinnaavarput
The Arctic Circle Greenland Forum-imi naammassineqaqqammersumi USA-mit aallartitat peqataapput. Aallartitat siuttuata Douglas Jones-ip immikkut pingaartillugu oqaatigaa, USA Issittup isumannaatsuunissaanut qulakkeerinnissinnaasoq, taamaammallu naalagaaffimmit pissaanilissuarmit issittumiittoqarnerulertoqartoq.
- Ataqatigiinneq, siunertaqarneq maannakkorpiarlu iliuuseqarusussuseqarneq malunnaateqarluarput.
Amerikamiut aallartitaasa siuttuat Douglas Jones taamatut oqarpoq.
The Arctic Circle Greenland Forum sapaatip-akunnerata naanerani Nuummi ingerlanneqarpoq, nunallu assigiinngitsut arlallit aallartitaat piffissami matumani unammillernartut annersaannik, pingaartumik silap pissusaata allanngoriartorneranik sillimaniarnermullu politikkimik oqaluuserinninniarlutik katersuussimallutik.
Douglas Jones-ip piffissani atorlugu USA-p Issittumi suliaqarnera oqaaseqarfigaa.
Issittup isumannaatsuunissaa
Tamatumunnga atatillugu Sermitsiaq.AG-mit amerikamiut Nuummi konsulateqarfianni taanna ataasinngornermi oqaloqatigineqarpoq. Douglas Jones-ip tassani aammaarluni erseqqissaassutigaa, USA Issittup isumannaatsuunissaanut qulakkeerinnittuusinnaasoq aamma Issittumi suliaqarnerulerusuttoqartoq. Tamanna pisariaqartinneqartoq isumaqarami.
- Ruslandi Issittumi sakkutuulersuinerulerpoq. Taamaallaat nutaanik sakkutooqarfiliorsimanngillat sakkutooqarfinnillu allanik narrunarsaanatik. Ruslandip aamma sakkuni nutaat akuerisaanngitsullu Issittumi misilerarsimavai.
Douglas Jones ingasaassilluni oqaaseqarusunngilaq, oqaluttuaraali Issittumi isumannaassuseq ulorianartorsiortinneqartoq. Sakkutuut isaannit piinnarani, aammali attaveqaasersuutit, internetsikkut isumannaassuseq, eqqunngitsunik paasissutissiisoqartarnera il. il. eqqarsaatigalugi.
- NATO isumannaallisaassaaq, ulorianartorsiortitsinerli ukkatarisariaqarparput.
Nukittuunik sakkutooqarnikkut illersuineq
Amerikamiut aallartitaasa siuttuat Issittumi sakkulersortoqanngittuartoqarnissaa pillugu aperineqarami oqarpoq, tamanna qulaurtissaanngitsumik anguniagaasoq. Oqaatigalugu, nukittuunik sakkutooqarnikkut illersuinertigut tamanna anguneqarsinnaasoq, taamaallilluni Ruslandi issittumi sakkulersortinnaveersaarneqarsinnaammat.
Tassunga atatillugu Kalaallit Nunaata inissisimanera qanoq isigaajuk?
- Kalaallit Nunaata Issittumi inissisimanera pingaaruteqarpoq, arlalippassuartigullu tunniussaqartarsimalluni, Douglas Jones oqarpoq:
- Assersuutigalugu teknologimut mingutsitsinnginnerusumu ikaarsaariarnermi aamma Kalaallit Nunaata aningaasaqarneq attaveqaasersuuteqarnerlu eqqarsaatigalugit qanoq akiuulluarnerusinnaanerata misissorneqarneratigut. Imminut nakuunerulersinnikkut isumannaallisaanermut tunniussaqartoqarsinnaavoq.
The Joint Committee
Sapaatip-akunnerata naanerani Issittumi unammilligassat oqaluuserineqarmata, oqaaserineqartut malillugit iliuuseqartoqarnissaa siunertaavoq, tassani USA-p ataatsimut ataatsimiititaliami oktobarip 18-iani ataatsimiittoqarnissaanut atatillugu Kalaallit Nunaat tikilluaqquaa.
Douglas Jones naapertorlugu - Amerikami Kalaallillu Nunaanni naalakkersuisut atassuteqaqatigiittarnerisa nukittunerulersinneqarnissaannut tamanna periarfissaavoq. Ataatsimut ataatsimiititaliami assigiinngitsunik suleqatigiissitaqarpoq, taakku USA-p Kalaallillu Nunaata qanoq ingerlariaqqinnissaannut aaqqiissutissarsiortussaapput.
Douglas Jones-ip nassuiaatigaa, matumani pingaarnerut niueqatigiinneq pineqartoq, tassa USA-p Kalaallillu Nunaata niueqatigiittarnerisa qanoq annertunerulersinneqarnissaanera aamma qanoq aningaasaliissuteqartoqarnerulersinnaasoq tassani pineqarlutik.