USA niuernikkut isumaqatigiissuteqarfigerusunneqarpoq
Naalakkersuisut Amerikamiut nunanut allanut ministeriannik Antony Blinkenimik ataatsimeeqateqarnerminni, USA niuernikkut isumaqatigiissuteqarfigerusullugu nalunaarutigisimavaat.
Nunatsinniit aalisakkanit tunisassiat Amerikap Avannarliup niuerfiinut toqqaannartumik tuniniarneqartassapput, USA-p niueqatigineqartarnissaanik Naalakkersuisut isumaqatiginninniarusunnerannut tamanna tunngavigineqartut ilagaat.
Amerikamiut nunanut allanut ministeriat Antony Blinken Kalaallit Nunaannut tikeraarmat Naalakkersuisut apeqqut tamanna qaqilerpaat.
Nunanut allanut Naalakkersuisoq Pele Broberg (N) Jens-Frederik Nielsenimut (D) akissuteqarnermini ilisimatitsivoq.
Pele Brobergip akissuteqarnermini nassuiaatigaa, ullumikkut niueqatigiinnermi aporfiusinnaasut Nunatsinnit tunisassiat Amerikami niuffaffinnut eqqunneqarnissaat ajornartittaraat.
Great Greenlandimit tunisassiat inerteqqutaasut
Ilaatigut tassani pineqarpoq, Amerkamiut inatsisaasa akitsuusiisarnerisalu niueqatigiinnissamut aporfiusarnerat. Assersuutigalugu USA-mi inatsisit malillugit imaani uumasunit miluumasunit tunisassiat eqqussoqqusaanngillat. Inatsit malillugu ilaatigut Great Greenlandimit tunisassiat USA-mi tuniniaqqusaanngillat.
Aalisakkanit tunisassiat eqqarsaatigalugit USA-mi inatsisitigut aamma piumasaqaataavoq, ingerlatseqatigiiffiup avammut niueruteqarniartup uppernarsarsinnaassagaa, periutsinik saniatigut pisarisanut, amerikamiut aningaasarsiutigalugu aalisarnermut periusaannut assersuunneqarsinnaassunik eqqussisimassalluni.
Brobergip ilanngullugu oqaatigaa, Nunatsinnit tunisassiat ileqquusoq malillugu kangimut Danmarkikkoortillugit assartorneqartartut, tamannalu tunisassianik USA-mik niueruteqarniarnermut naapertuutinngitsoq.
Amerikami niuerfinnut eqqussisinnaaneq pitsaanerulersinniarlugu Naalakkersuisut niuernikkut isumaqatigiissuteqarusunnertik nunanut allanut ministerimut Blinkenimut oqaatigisimavaat.
Pituffik pillugu isumaqatigiissut aqqutissiuisinnaasoq
Assersuutigalugu neriuutigineqarpoq, isumaqatigiissuteqarnikkut Nunatsinnit tunisassiat USA-mut eqqunneqarneranni akitsuutaasartut atorunnaarsinneqarsinnaanerat.
Pele Brobergip Pituffimmi kiffartuussinissamut isumaqatigiissut 2020-mi USA-mik isumaqatigineqartoq innersuussutigaa, Tassani aalajangersimasumik pisortatigoortumik oqaloqatigiittarfeqarnissaq, Kalaallit Nunaata USA-Hu naapittarfissaat aammalu ataatsimut soqutigisanik niueqatigiinnermut aningaasalissuteqarnernullu attaveqaatit pitsaanerulersinneqarnissaat anguniarlugit.
- Tassunga atatillugu Kalaallit Nunaata USA-llu akornanni niueqatigiinnerrni aporfiusinnaasut naaperiaaffiginissaannut periarfissanik ujartuinissaq siunertarineqarpoq, Pele Broberg Demokraatit siulittaasuannut Jens-Frederik Nielsenimut akissuteqarluni allappoq.
Partiimi siulittaasup inuussutissarsiornermullu naalakkersuisuusimasup Jens-Frederik Nielsenip Naalakkersuisut USA-mik niueqateqartarnissamut isumaqatigiissusiorniarlutik suliaqarnerat pitsaasutut isigaa.
Demokraatit siulittaasuat: Niueqatigiinnissamik isumaqatigiissuteqarnissat pingaaruteqarluinnarput
- Naalakkersuisut nikinnginneranni sulissutigisimasatsinnut tamanna naapertuuttpoq. Steen Lynge nunanut allanut naalakkersuisuummat angusaqarsimaqaagut Pittuffimmullu atatillugu isumaqatigiissusioqataasimalluta, Jens-Frederik Nielsen oqarpoq.
Taassuma eqqaasitsissutigaa, Naalakkersuisuusimasut Tuluit Nunaannik niueqateqarnissamik isumaqatiginninniaramik angusaqarsimaqisut, neriuutiginerarpaalu Naalakkersuisut nutaat isumaqatigiissuteqarumaartut.
- Isumaqatigiissuteqarnikkut aalisakkanit tunisassiaatitta akitsuuserneqannginnissaat anguneqarsinnaavoq, tamanna avammut niuertarnitsinnut suliffissaqartitsinitsinnullu pingaaruteqarluinnarpoq, Jens-Frederik Nielsen oqarpoq.