USA-mi kalaallip toqunnerarnerani politiit arnaq toqutsisutut tigusaraat

Arnaq 36-nik ukiulik kalaallimik sakkutuujusimasumik Poul Hansenimik USA-mi New Orleansimi toqutsisimasutut tigusarineqarpoq.

New Orleansimi politiit tusagassiortunut oqaaseqartartua Ekstra Bladetimut taama ilisimatitsivoq.

Poul Hansen USA-mi sulinngiffeqarluni angalavoq. Taassuma motorcykelerluni ikinngutinilu nuna ingerlaarfigigaluarpaa.

Arfininngornermi ullaakkut maajip 18-anni New Orleansimi aqqusinermi toqulersoq nassaarineqarpoq – aallaaneqarsimalluni. Ekstra Bladetip allaaserisaa naapertorlugu, toqusup timaanik misissuinerup takutippaa, niaqqumigut aallaaneqarluni toqusimasoq.

Peqqarniitsumik ujajaaffigineqarsimasoq nalilerneqarpoq.

- Pinerluffigineqarsimasoq takussutissartaqarpoq. Akunnittarfimmiiffigisami ungasinngisaani aallaaneqarsimasoq nassaarineqarpoq, pigisaalu amigaataapput. Ujajaasoqarsimarpasippoq, Mads Pramming, toqusup ilaqutaanut eqqartuussissuserisuusoq siornatigut taama oqaluttuarpoq.

Ekstra Bladetip allaaserinninnera naapertorlugu arnaq paarnaarunneqartoq "second degree murder"-imik unnerluunneqarpoq. Tamanna toqutsineruvoq pilersaarutaanngitsoq, Poul Hansenillu ujajaanermut atatillugu aallaaneqarsimaneranut tamanna nassuiaatissamut tulluarsinnaavoq.