USA-mi eqqartuussiviup nunami sila pillugu politikkimik meeqqat eqqartuussivimmi suliassanngortitsinerat itigartikkaa
Inuusuttut arfineq-pingasuniit 19-inut ukiullit USA-mi naalakkersuisut sila pillugu politikkiannik eqqartuussivimmi suliassanngortitsinerat itigartinneqarsimavoq. Dommerilli paasinnissinnaagaluarput.
USA-mi eqqartuussiviup, meeqqat inuusuttullu Amerikami naalakkersuisut sila pillugu politikkiata siunissartik ulorianartorsiortikkaat innersuussutigalugu eqqartuussisunut suliassanngortitsinerat tallimanngormat itigartissimavaa.
Suliassanngortitsisunut tamanna ilungersunarpoq, arlaleriarlutimmi taamatut eqqartuussivinnut suliassanngortitsiniarlutik misiliisarsimagaluaramik.
Eqqartuussivimmi – the 9th U.S. Circuit Courtimi - eqqartuussisut marluk itigartitsisut ataaserlu akuersaartoq, aalajangiinerminni oqaatigaa, eqqartuussisunut suliassanngortitsisut pisup aallartinnerani arfine-pingasut 19-illu akornanni ukiullit, suliassaanngortitaminnik ingerlatsinissamut inatsisitigut tunngavissaqanngitsut.
Ilanngullugu oqaatigaa, inuusuttut naammagittaalliuutaat naalagaaffeqatigiinni oqartussanit allanit suliarineqartariaqartoq.
Dommerilli ilaata Andrew Hurwitzip oqaatigaa, eqqartuussivik "nangaassuteqarluni" aalajangiisimasoq. Inuusuttut suliakkiissutaat paasisinnaanerarpaa.
Taassuma oqaatigaa, naalakkersuisut aamarsuarnik, uuliamik ikummatissanillu allanik qangali siuarsaaniartuarnerannut "qularnaatsunik" uppernarsaatissaqartoq. Silap pissusaata allanngoriartornerata kingunipiloqarsinnaanera pillugu ilisimasat naammakkaluarput.
Dommeri aalajangiinermut akerliusoq Josephine Staton isumaqarpoq, USA-mi tunngaviusumik inatsimmi silap pissusiat allanngoriartorneranit nunap ajoquserneqartuartarnissaa "akuersaarneqanngitsoq".
Assigiinnarpaa naalakkersuisut issiaannarlutik asteroide nunarsuup tungaanukartoq qanoq iliuuseqarfiginagu isiginnaaginnaraat, taanna oqarpoq.
Eqqartuussiviup aalajangiineratigut suliaq annertuumik kinguneqartitsisinnaasoq unitsikkallarneqarpoq.
Eqqartuussisunut suliassanngortitsisuuvoq inuusuttut suliniaqatigiiffiat, Our Children's Trust. Oregonimi qullersaqarfilik.
Suliniaqatigiiffiup eqqartuussisunut suliassanngortitani siusinnerusukkut eqqartuussivinnut tunniuttarsimagaluarpaa. Tassa Washingtonimiit Alaskap tungaanut ingerlaarlutik eqqartuussivinni appasinnerusuni suliassanngortitsisarsimagaluarput.
Eqqartuussisunut suliassanngortitsineq siulleq 2015-imi Oregonimi eqqartuussivimmut tunniunneqarsimavoq. Taamanikkut tunngavilersuutigisimavaat, naalakkersuisut avatangiisinut nukissiuuteqarnermullu tunngasutigut politikkiata meeqqat inuusuttullu peqqinnartumik ajunngitsumillu atugaqarlutik alliartornissamut inatsisitigut pisinnaatitaaffii innarlerai.