Skip to main content

USA Kalaallit Nunaallu Pituffik pillugu isumaqatigiissuteqartut

Danmarkip, USA-p Kalaallit Nunaallu Pituffimmi kiffartuussinissamut isumaqatigiissutissamut nutaamut sinaakkutissat ullumi isumaqatigiissutigaat. Isumaqatigiissut USA-mit Kalaallit Nunaannillu atsiorneqarsimavoq.

Ullumi pingasunngornermi qaffasissumik ataatsimeeqatigiinnermi isumaqatigiissutigineqarput allakkat uppernarsaatit sisamaasut, taakku katillutik USA-p Danmarkip Kalaallit Nunaatalu Pituffimmi kiffartuussinermi isumaqatigiissutinut ukiorpanngortuni isumaqatigiinninniarneranni inernerupput.

Allakkat uppernarsaatit ilaat ataaseq nunat marluk, Kalaallit Nunaata USA-llu akornanni suleqatigiinnerup ingerlariaqqinnissaanik pilersaarut atsiornertalik isumaqatigiissutaavoq.

Isumaqatigiissut aqqutigalugu Kalaallit Nunaata USA-llu siunissami suleqatigiinnissamik pilersaarutaannut, Naalakkersuisut Siulittaasuannit Kim Kielsenimit Amerikamiullu ambassadøriannit Carla Sandsimit atsiorneqarsimasumut, Kalaallit Nunaat sunniuteqarlunilu iluaquserneqassaaq.

- USA-mik nunat marluk akunnerminni ataatsimoortumik pilersaarummik isumaqatigiissuteqarnerput iluarisimaartorujussuuarput. Naalakkersuisuniit, Inatsisartunit inuiaallu kalaallit tungaanniit amerikamiut nunatsinniinnerata piviusumik, tigussaasumillu iluaqutaanissaa pingaartissimasorujussuuarput, Kim Kielsen oqarpoq.

Suliaq tunngaviusoq

- Ataatsimoorluta pilersaaruteqalernitsigut, neqeroortitsisarnissamut piumasaqaatit nutaat isumaqatigiissuteqarnissamullu piumasaqaatissat isumaqatigiissutigisimasavut aqqutigalugit siusinnerusumut sanilliullugu pitsaanerujussuarnik atugassaqalerpugut, Kim Kielsen isumaqatigiissummik nutaamik atsiornermut atatillugu oqarpoq.

Nunat allanut Nukissiuuteqarnermullu Naalakkersuisup Steen Lyngep isumaqatigiissutip pingaaruteqassusaa erseqqissaatigaa.

- Suliaq tunngaviusumik annertoorujummik Kalaallit Nunaannut isumaqaqaaq, tassami uaguuvugut amerikamiut sakkutooqarfianik nunamiititsisut, tulluusimaarutigivarpullu Pituffiup Kalaallit Nunaatalu Amerikap isumannaatsuunissaata saniatigut kalaallit atlantikorlu ikaarlugu isumannaatsuunissamut qitiusumik inissisimanitta akuerineqarnera, taanna oqarpoq.

Naalakkersuisut naapertorlugit, suliariumannittussarsiornermi piumasaqaatit nutaat, Pituffimmi kiffartuussinissamik isumaqatigiissutissani nutaassani kalaallit suliffeqarfiutaannut iluaqutaassapput. Siunertarineqarpormi, amerikamiut nunatsinniinnerata siammasissumik annertunerpaamillu Kalaallit Nunaannut iluaqutaanissaa.

Soorlu amerlanerusunik ilinniartoqarnissamut, suliffissaqartitsisinnaanermut periarfissanik aammalu akileraarutitigut isertitassatigut, Naalakkersuisut ilisimatitsipput.

Oqaluttuassartaa naatsumik

Kiffartuussinissamut isumaqatigiissut pillugu suliaq – aserfallatsaaliinissamut, sanaartornermut kantinamillu ingerlatsinermut il. il. tunngassuteqartoq – 2014-imi ingerlatseqatigiiffimmut amerikamiunit pigineqartumut USA-mit tunniunneqarpoq. Tamanna pisoq sioqqullugu isumaqatigiissut ukiorpassuarni danskit-kalaallit ingerlatseqatigiiffiannit ingerlanneqartarsimavoq.

Kunngeqarfiup Danmarkip isumaa naapertorlugu, taamanikkut tunniussisimaneq Kunngeqarfiup USA-llu isumaqatigiissutaanut akerliusumik pisimavoq; illersornissaqarfiup isumaqatigiissutaata katitigaaneranik taaneqarsimasumut. Kunngeqarfik USA-lu suliariumannittussarsiornissami tulliuttumi kalaallit/danskit ingerlatseqatigiiffiannik isumaqatigiissusiortoqarnissaa anguniarlugu suliariumannittussarsiuussinermi piumasaqaataasussat pillugit 2014-imili isumaqatiginninnialersimapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER