Uranitalinnik qalluinissaq qanilleriarpoq
Naalakkersuisooqatigiilersut isumaqatigiissusiorput aatsitassat qaqutigoortut aamma uranitaqarsinnaasut qallorneqarnissaat pillugu
Kujataani aatsitassarsiorsinnaaneq pillugu misissuinerit naammassisariaqalerput taamalu qalluilernissamut alloriartoqarluni.
Naalakkersuisut tassaasut Siumut, Atassut, aamma Nunatta Qitornai Demokraatinit tapersersorneqartut naalakkersuisooqatigiinnissamik isumaqatigiissusiorput taamatut paasineqarsinnaasumik. Aatsitassarsiornissamut suliniutit tigussaasut marluk aalajangiiffigineqarnissaut utaqqiinnartut tassaapput Killavaat Alannguanni aamma Kuannersuarni suliniutit. Aatsitassarsiorfiginiarneqartut tamarmik aatsitassanik qaqutigoortunik akoqarput.
- Erseqqissaatigerusuppara aatsitassanik qaqutigoortunik kujataani qalluinissamut qinnuteqaammik naalakkersuisuni suli tigusaqarsimannginnatta. Taamaattoq naatsorsuutigaarput qalluinissamik qinnuteqaammik sapaatit akunnerisa arfineq pingasut ingerlaneranni tigusaqarumaarluta, Nunatta Qitornaani siulittaasoq Vittus Qujaukitsoq aatsitassanut aamma naalakkersuisuugallartoq oqarpoq.
Aatsitassanik uranitalinnik qalluisoqarsinnaanera ukiorpassuarni isumaqatigiinngissutaavoq. Uranimut naaggaarluinnarsimaneq 2013-mi atorunnaarsinneqarpoq. Taamaattoq kujataani suli aatsitassarsiortoqanngilaq naak nunap immikkoortua taanna suliffissaaleqinermit noorarermillu eqqugaasimagaluartoq.
- Ukiorpassuarni misissuisoqareerpoq. Aalajangernissamut piffissanngorpoq alloriaqqittoqarlunilu. Aatsitassanut inatsiseqarpugut malinneqartussamik. Tassani ilaatigut allassimavoq akuersissummik tunniussisoqarsinnaanngitsoq peqqissutsimut avatangiisinullu navianaateqarpat, soorumi tamanna malittussaavarput, Vittus Qujaukitsoq oqarpoq.
Taamaattoq nalunaarutiginngilaa aatsitassarsiortitseqatigiffik sorleq qalluinissamut qinnuteqassamaalernersoq.