qinersineq 2014
Uranip taasissutigineqarnissaa amerlanerussuteqartut isumaqatigaat
Innuttaasut amerlanerussuteqartut isumaqarput Kalaallit Nunaat uranimik piiaassanersoq innuttaasunut taasissutigineqartariaqartoq
Amerlanerussuteqartut isumaqatigaat Kalaallit Nunaat uranimik piiaassanersoq innuttaasunut taasissutigineqartariaqartoq. Tamanna takuneqarsinnaavoq Sermitsiap qineqqusaarnermi sammineqartut arfineq-marluk immikkut toqqakkat pillugit isumasiuinerani. Qinersisartunik isumasiuineq Sermitsaq sinnerlugu ingerlanneqarsimavoq HS-Analysemit.
Isumasiuinerup aamma takutippaa amerlanerussuteqartut isumaqartut namminersorlutik oqartussat inissialiornermut atugassai Qaqortumi mittarfiliornermut atorneqassanngitsut. Isumasiuinermi mittarfiliornissaq imatut akerlerineqanngikkaluartoq, akerlerineqarlunili inissialiornermut atugassat mittarfiliornermut atorneqarnissaat.
Taamatuttaaq isumasiuinerup takutippaa amerlanerussuteqartut isumaqartut kommunerujussuit kommuninut mikinernut aggoqqinneqartariaqartut. Amerlanerussuteqartut isumaqarput selskabit namminersorlutik oqartussanit pigineqartut namminersortunngorsarneqassasut. Taamatuttaaq amerlanerussuteqartut isumaqarput akileraarut nuna tamarmi apparsinneqassasoq. Aamma amerlanerussuteqartut isumaqarput Sermersooq naligiissaarinermi kommuninut allanut akiliinikinnerusalissasoq. Kiisalu amerlanerussuteqartut isumaqarput partiit angisuut marluk qinersinerup kingorna suleqatigiittariaqartut.
Isumasiuineq Sermitsiami sapaatip akunnerani uani saqqummersumi atuarsinnaavat, taannalu akeqanngilaq.