Uranip soqutigineqaqqilernera avatangiisinik illersuiniartunit ernummatigineqartoq
Ingerlatseqatigiiffiit amerlanerujartortut kujataani uraneqarnera soqutiginerujartorpaat. Kingullertigut Bluejay Mining ujaasinissaminut akuerineqarpoq, maannalu tusaamaneqaalerpoq Frankrigip naalagaaffiani uranimut ingerlatseqatigiiffik Orano aamma ujaasinissaminut qinnuteqarsimasoq
Greenland Minerals Ltd. aamma Tanbreez Mining kujataani ingerlatseqatigiiffinnit arlalinnit uranimik pingaarnertut saniatigulluunniit tunisassiornissaminnik soqutiginnittunit ilaneqangajalerput. Kingullertigut Bluejay Mining Plc. Ikerasassuup eqqaani sumiiffimmi 2.025 kvadratkilometeriusumi ujaasinissamik qinnuteqarsimallunilu akuerineqarsimavoq. Ingerlatseqatigiiffiup nammineq atortumini erseqqissarpaa kujataani uraneqarfiit annersaasa tullerisinnaasaa pineqartoq, Sermitsiaq allappoq.
Maannalu tusaamaneqalerpoq Frankrigimi uranimik ingerlatseqatigiiffik Orano naalagaaffiup suliffeqarfiutaanit Arevamit pigineqartoq sumiiffimmi 2.486 kvadratkilometeriusumi ujaasinissaminut qinnuteqarsimasoq.
Innuttaasunik ataatsimiisitsisoqarnissaa piumasaraa
Taamatut ineriartortoqarnera avatangiisinut suliniaqatigiiffit ernummatigaat. Narsami Urani Naamimmi siulittaasup Mariane Paviasenip Narsarmi innuttaasut inissaarutingajalernerat ernummatigaa.
– Arlarleriarluta aperisarpugut aatsitassanut Naalakkersuisoq Vittus Qujaukitsoq innutaasunik ataatsimiisitsinniannginnersoq. Killavaat Alannguani Tanbreezip suliniutaata Greenland Minerals Ltd.-llu Kuannersuarni suliniutaata piiaanissamut akuerineqarnissaat naatsorsuutigalugu kingullermik oqariartuutaa peqqutigalugu oqaloqatigerusuttupilussuuarput. Qanoq isumaqarnersoq tusarusupparput. Qineqqusaarnermi oqarpoq innuttaasut sullinniarlugit, Naalakkersuisutulli ima isikkoqarpoq nunanit allanit ingerlatseqatigiiffiit taamaallaat sullikkai. Kingumut sumiginnarneqaqqippugut.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: