urandebat

Uranip oqallisiginissaata kinguartinneqarnissaanut tunngavissaqanngilaq

– Inatsisartut ukiakkut ataatsimiinneranni Naalakkersuisut ´uranimut akuersaannginnerup´ atorunnaarsinneqarnissaanik tunngaviusumik siunnersuuteqarniarput, Jens-Erik Kirkegaard oqarpoq, kinguneqaatissanillu naammattumik paasissutissiinnginnermik oqarneq eqqunnginnerarlugu

Aatsitassarsiornermi uranip saniatigut tunisassiatut akuersaannginnerup atorunnaarsinnissaanik tunngaviusumik aalajangiinissap kinguartinneqarnissaa Jens-Erik Kirkegaardip tunngavissaqarsorinngilaa.

Aatsitassarsiornermi uranip saniatigut tunisassiatut akuersaannginnerup atorunnaarsinneqarnissaa Naalakkersuisut aalajangiusimavaat.
Inuussutissarsiornermut Aatsitassanullu Naalakkersuisoq Jens-Erik Kirkegaard, Siumut, IA-meersup Naaja Nathanielsenip paragraf 37 naapertorlugu apeqqutaanut ima akissuteqarpoq:
– Taamaattumik Naalakkersuisut EM 2013-imi (ukiakkut ataatsimiinnermi) ´uranimut akuersaannginnerup´ atorunnaarsinneqarnissaanik tunngaviusumik siunnersuuteqarniarput.
Nangipporlu:
– Pingaaruteqarpoq malugissallugu aalajangiivigisassatut siunnersuut tunngaviusumik aalajangiivigisassaammat. Tassa imaappoq, uranimik atuinissamik qinnuteqaammut isummertoqartinnagu avaatangiisinut inuiaqatigiinnullu atasinnaassutsimik misissuisoqaqqaartassaaq, Jens-Erik Kirkegaard Naaja Nathanielsenip paragraf 37 naapertorlugu apeqqutaanut akivoq.
Innuttaasut peqataassapput
– Qinnuteqaatinik suliarinninnermi tusarniaanerit innuttaasullu akulerutsinneqartarnissaat piumasaqaataassaaq allanngortinneqarsinnaanngitsoq. Pingaartumik illoqarfinni nunaqarfinnilu, uranimik atuinissamik qinnuteqarfiit eqqaanniittuni innuttaasut annertunerusumik paasissutissinneqartarnissaat akulerutsinneqartarnissaallu Naalakkersuisut piumasariniarpaat, politikeri Siumumeersoq oqarpoq.
Inatsisartut ukiakkut ataatsimiinnerat aallartissaaq tallimanngornermi septembarip 13-ianni.

Powered by Labrador CMS