Uranimut tunngatillugu nipaannersuaq
Uranimik Nunatsinneersumik tunisassiornissamut avammullu tuniniaanissamut atatillugu Naalakkersuisut Greenland Minerals Limitedimut aamma Shenghe Ressourcesimut qanoq isumaqatigiissuteqarsimanerminnik oqaaseqarusunngillat. Urani pillugu isumaqatigiissut 2016-imeersoq naapertorlugu, uranip inuttassarinngisaminit pissarsiarineqannginnissaa Danmarkip akisussaaffigaa
Aviisimit Sermitsiamit maanna sapaatip-akunnerini marlunngulersuni naalakkersuisoq akisussaasoq apeqqutit pisariunngitsut akissutissarsiniarlugit saaffigisarsimagaluarparput, ilaatigut Kinami Shenghe Ressourcesip aamma naalagaaffiup ingerlataata China National Nuclear Corporationip ingerlatseqatigiiffik Hua Sheng pilersissimammassuk, qanoq isumaqarfigineraa paaserusullugu.
Pilersinneqartoq saffiugassanik qaqutigoortunik aamma tunisassianik radiup qinngulaneranik akulinnik, ilaatigut Kuannersuarneersunik pisiortornermik suliareqqiinermillu isumaginnittuussaaq.
Naalakkersuisut akissuteqanngitsut
Apeqqutigerusukkaluaratsigu uranimik piiaanissamut periuseriniarneqartut Naalakkersuisunit akuerineqarsimanersut, tamatumunnga ilanngullugu naalakkersuisup Kinamiut ingerlatseqatigiiffiat sakkutooqarnermut soqutiginnittuullunilu illuatungaatigut sakkutuujunngitsunut soqutigisaqartussaammat, tamatumalu kinguneranik kalaallit uraniutaata Kinamiut atomimik nukissiorfiinut tunineqartalernissaa qanoq isumaqarfigineraa paaserusullugu.
Akineqarnerli ajorpugut. Sisamanngormallu oqarfigineqarpugut apeqqutiginiakkavut aatsitassanut naalakkersuisumut Erik Jensenimut apeqqutiginiaraluakkavut inuussutissarsiornermut nukissiuuteqarnermullu naalakkersuisumut Aqqalu Jerimiassenimut apeqqutigisariaqarivut. Tamatumani tunngavilersuutigineqarluni apeqqutinut ilaatigut atomimut tunngasunut isumannaatsuunissamut avammullu tuniniaanermi nakkutilliinermut tunngassuteqarmata.
Allaaserineqartoq aviisimi Sermitsiami tamakkiisumik atuaruk. Aviisi uani pisarineqarsinnaavoq: