Uranimut atatillugu taarsiiffigitissinnaaneq pillugu allakkiaq isertuussaasoq
Eqqartuussissuserisoqarfiup Poul Schmidtip uranimut inerteqquteqarneq inatsisitigut naliliiffigisimavaa. Naalakkersuisullu naliliisimaneq eqqartuussivimmi uranimut inersteqquteqarneq siunissami suliarineqassap atorneqarsinnaammat tamanut saqqummiukkusunngilaat.
Uranimut inerteqquteqarneq pillugu oqallinnermi qitiusimasut ilagaat, Namminersorlutik Oqartussat suliffeqarfinnut misissuinerminni miliuunerpassuarnik atuisimasunut taamalu inerteqqutip nutaap malitsigisaanik piiaanissamut akuersissummik qinnuteqarnerminni itigartinneqartussatut ilippanaatilinnut taarsissuteqassanersut.
Aatsitassarsiutileqatigiiffik Namminersorlutik Oqartussanik eqqartuussivimmut suliassanngoritsissappat apeqqut pineqartoq eqqartuussivinni taamaallaat inaarutaasumik paasisaqarfiusinnaavoq. Naalakkersuisut eqqartuussivilersuussisoqarsinnaaneranut piareersarsimapput.
Aatsitassanut Naalakkersuisup Naaja H. Nathanielsenip (IA) Demokraatini siulittaasumut Jens-Frederik Nielsenimut akissuteqarluni ilisimatitsissutigaa, uranimut inerteqquteqarneq eqqartuussissuserisoqarfimmut Poul Schmidtimut inatsisitigut nalilersortinneqarsimasoq, naliliisimanerlu siunissami eqqartuussivitsigut sulikkiissuteqarnermi atorneqarsinnaammat tunniunneqarnianngitsoq.
Akisunipilussuanngorluni kinguneqarsinnaava?
Jens-Frederik Nielsenip inatsisitigut naliliisitsisimanerup innuttaasunit ilisimaneqannginnissaa eqqarsaatigalugu akissutisiani naammaginngilai. Partiimi siulittaasoq isumaqarpoq, Naalakkersuisut saqqummerlutik Inatsisartuni inatsisiliortut innuttaaasullu eqqissisarlugit inatsisit malinneqarnerarlugit annertoorsuarmillu akiligassaqartoqalissanngitsoq oqaluttuuttariaqarpaat:
- Siullertut nunami maani aningaasaliissuteqarusuttoqartarnera sequmilerparput, aappaattullu naalakkersuisup qulakkeerlugu oqaatigisinnaanngilaa tamanna akisunipilussuanngorluni kinguneqarsinnaanersoq, Jens-Frederik Nielsen oqarpoq.
Naalakkersuisut siusinnerusukkut ilisimatitsissutiginikuuaat, pisinnaatitsissummik pigisaqartut inatsimmit sunnerneqartussat ukiuni 2016-imiit 2020-mut misissuinerminnut 146 millioner koruuninik atuisimasut. Naaja Nathanielsenip Sermitsiaq.AG-mut allakkatigut akissuteqarluni oqaatigaa, siullertut Greenland Minerals oqaloqatiginiarlugu. Ingerlatseqatigiiffiummi inatsisip malitsigisaanik Kuannersuarni suliniutaa taamaatinneqariaannaammat ingerlatseqatigiiffik saakkortuumik eqqugaasussaammat:
Uranimik piiaasoqarnissaanut piumasaqaatit immikkut ittut
- Maannakkorpiaq eqqartuussivimmut suliassanngortitsiniartoqarpasinngilaq, aamma GME-p suliniutaa pillugu suli oqaloqatiginngilakka, taamaammat allat oqaloqatigilersinnagit taakku oqaloqatiginissaat qilanaaraara, Nathanielsen oqarpoq.
Naalakkersuisup ilanngullugu erseqqissaassutigaa, uranimut inerteqquteqarnermi oqartussaaqataanermi ingerlatseriaaseq malinneqarsimasoq, aamma tusarniaassutigineqarlunilu inatsisiliortunit suliarineqarsimasoq. Tamakkua saniatigut uranimik piiaasinnaaneq eqqarsaatigalugu piumasaqaatit immikkut ittut atuuttut oqaatigaa:
- Urani eqqarsaatigalugu akuersissutit tamarmik 2011-mili immikkut ittumik piumasaqaatitaqalerput, piumasaqaatit naapertorlugit politikkikkut pissuteqartumik uranimik piiaanissamut qinnuteqaatit itigartinneqarsinnaapput. Piumasaqaatit immikkut ittuusut naalakkersuisooqatigiit nikikkaangata tunniunneqartarput, aamma Siumukkormiut siuttuuneranni, Naaja Nathanielsen oqarpoq.