Uranimik isumaqatigiissutip kingorna GME-p aktiaatimi nalinga qaffatsippaa

Greenland Minerals and Energy (GME), aatsitassanik qaqutigoortunik aamma uranimik Narsap eqqaani piiaaffiliorniarlutik pilersaarusiortut, ulluni kingullerni Australiamiut børsianni ataqqinaamminni qaffapput.

Sapaatip-akunnerani kingullermi naalagaaffeqatigiit urani pillugu isumaqatigiinnerat saqqummiunneqarmat, GME-p nalinga procentinik qulinik qaffariarpoq.

Aningaasatigut qularnaanneq
The Australian taama allappoq.

The Australianimi atuaruk: GGG shares jump on uranium agreement

Aktianik aningaasaliisartunut aningaasanik iluanaarnissamut aamma annaasaqarnissamut qularnaaqut pingaanersaavoq.

Aamma naak uranimut isumaqatigiissut atuutilinnginnermini upernaaru Folketingimi akuerineqartussaagaluartoq, nutaarsiassaq Kuannersuarmi suliniummut piumaneqassusaanullu qularnaannerulersitsivoq.

Atuaruk: Danmarkip Nunattalu uranimik avammut niuernissaq isumaqatigiissutigaat

Naalakkersuisut aamma Danmarkimi naalakkersuisut akornanni isumaqatigiissutaat suli isertuunneqarpoq, ilaatigut tamanna Inuit Ataqatigiinnit isornartorsiorneqarpoq, kisianni isumaqatigiissut inuussutissarsiornermut, pisortanut aamma illersornermut akisussaaffimmik avinneqarnissaa naatsorsuutigineqarpoq, uranimik avammut niuersinnaanissaq eqqarsaatigalugu.

Suli ungasittoq
Qanittukkut Cindy Vestergaardip, illersornissamut ilisimatusartup Sermitsiaq.AG-mi oqaluttuaraa, naak uranimut isumaqatigiissuteqartoqaqqammeraluartoq, aatsaat ukiut qulit angullugit qaangiuppata GME Kalaallit Nunaannit uranimik assartuisinnaalersinnaassasoq.

Kuannersuarni piiaaffik ullut arlaanni ammassaguni, ukiuni 37-ni ammasinnaassasoq naatsorsuutigineqarpoq.

Atuaruk: Uranitalinnik tunisassiornissaq imaaliallaannaq pinavianngitsoq

Atuaruk: Narsami IA: Piaaffimmut taarsiullugu nutaamik periarfissitsigut