Urani Siumup aamma Partii Naleqqap isumaqatigiinngissutigaat

Partiip ataatsimiittarfiata silataani raatiu nipittungaatsiarlugu inissinneqarsimavoq, ataatsimiittunut attuumassuteqanngitsut marserusukkaluit tusaasaqannginnissaat pillugu. Partii Naleqqap siulittaasua minillugu kikkut tamarmik nuannaarput.

- Assersuutigalugu uranimut tunngatillugu isummagut assigiinngillat, taamaattumik partiit tunuliaquttavut oqaloqatigeqqaartariaqaratsigit anivugut, Hans Enoksen Siumukkunnik ataatsimeeqateqareerluni oqarpoq.

Naammagisimaarinnippallaanngitsoq
Ataatsimiinnertik ersaattaappalullutik aallartippalukkaluarpaat. Pilluarnerli sivikissimagunarpoq, partiimmi siulittaasua naammagisimaarinnippallaanngitsutut pissuseqarluni nalunaaquttap akunnerata affaannaani sivisusseqartumik oqaloqateqareerluni ataatsimiittarfimmit anivoq.

Partiit sinnerisa siulittaasui tamarmik immikkut nalunaaquttap akunnerata ataatsip missaani isersimapput.

Hans Enoksenip Siumumik suleqateqarsinnaanissani neriuuteqarfigalugu ippassaq isertuanani taagaluarpaa. Ualeq mannali aperineqarami naaggaartutullusooq qinngani sukattarpaa.

- Tamanna pillugu oqaaseqaqqissinnaangilanga, oqarpoq.

Isumaqatigiinniarnerni siuttumit qaaqquneqaqqissanerluni nalunerarpaa.

IA suleqatigiinnissamik neriuuteqarpoq
Partiini allani siulittaasut qungujulaarlutik ataatsimiittarfik qimattarpaat.

- Ataatsimiilluarpugut aamma ippassaq oqaluuserisavut nangippavut. Partiinik tamanik suleqateqarusussinnaalluta Siumumut erseqqissumik oqariartuutigaarput, Inuit Ataqatigiit siulittaasuat Sara Olsvig naatsumik nassuiaateqarluni oqarpoq.

Siumukkormiulli taamatuttaaq suleqatiginnikkusussutsimik takutitsisimanersut
oqaaseqarfigiumanngilaa.

- Nammineq akisariaqarpaat, oqarpoq.

Siumukkut ataatsimeeqatigeqqissanerlugit oqaaseqarfiumanngikkallarpaa.

Demokraatit oqaaseqarpiarumanngillat
Demokraatit siulittaasuata ataatsimiinnerminni oqaluuserisimasatik ataatsimiinnerlu nuannersimanersoq akunnassimasorluunnit oqaaseqarfigiumanngilai.

- Ullumikkut oqaluuserisavut soorunami allaapput. Kisianni tusagassiorfitsigut nassuiaateqarusunngikkallarpunga, partii tunuliaqutarisara ilisimateqqaarusuppara, siulittaasuat Andreas Uldum nassuiaavoq.

Demokraatit naalakkersuisooqatigiittussanut peqataanissaanut neriuuteqarnersoq taamatuttaaq oqaaseqarfigiumanngilaa. Aningaasaqarnerulli ilorraap tungaanut saatinnissaa pingaartuunerarpaa, tamannalu naalakkersuisooqatigiikkaluaraanni imaluunnit illuatungiliuttuugaluaraanni sulissutigisariaqarnerarlugu.

Kim Kielsen qanoq siunnersorsinnaaviuk?

- Piviusorsiortumik eqqarsartariaqarpoq aamma partiit sapinngisamik amerlanerpaat suleqatigalugit nunatsinni ajornartorsiutit iluarsiniarlugit piviusorsiortumik sulisariaqarpoq, Andreas Uldum tikkuaavoq.

Atassutikkut sivisuumik ataatsimeeqatigineqarput
- Aatsaat aappassaa kaffisoqatigiippugut, suli aalajangertoqanngilaq. Oqaloqatigiissutigisattali nangeqqinnissaat pillugu qaaqquneqaqqinnissarput neriuutigaarput, Atassutip siulittaasua Knud Kristiansen qungujulaarluni oqarpoq.

Atassut partiinit allanit tamanit sivisunerpaamik ataatsimeeqatigineqarput, nalunaaquttap aappaa avillugu Siumukkunniimmata. Ataatsimiinnerulli sivisussusaa apeqqutaanngitsoq Knud Kristiansenip erseqqissaatigaa, matumani susassaqartut tamarmik partiini atorfilittat ilanngullugit ataatsimeeqatigineqarnissaat pingaartinneqarsimammat.

- Kisianni isumalluarpugut neriulluarlutalu, erseqqissaavoq.

Allaqqissaarisoqalerpoq
Partiinik ataatsimeeqateqarnermi oqaluuserineqarsimasut maanna allaqqissaarneqalersut Siumup siulittaasuata tulliata siulliup Jørgen Wæver Johansenip ilisimatitsissutigaa. Ataatsimiinnerit unnugu aqagulu nangeqqinneqassapput.

Siumup siulittaasuata suna tamaat aamma isertuukkallarpaa.

- Ataatsimiinnerit aallarniutaasut kisiisa ingerlannikuuagut, suli aalajangiisoqanngilaq, Kim Kielsen erseqqissaavoq.