Urani pillugu taasisitsinissamut naamik
Uranimik piiaasoqarnissaanut innuttasut taasitinneqarnissaannut siunnersuut Naalakkersuisut tapersinngilaat
Uranitalinnik aatsitassarsiortoqartinnagu innuttaasut taasitinneqarnissaannut Inuit Ataqatigiit siunnersuutaat Naalakkersuisut tapersinngilaat. Aatsitassanut Suliffeqarnermullu Naalakkersuisup, Erik Jensenip (S) akissuteqaataani tamanna atuarneqarsinnaavoq.
IA-p inatsisartunit gruppia isumaqarpoq uranimut naaggaarluinnarnerup 2013-imi atorunnaarsinneqarmalli inuiaqatigiit avissaartuutilersimasut – sulilu avissaartuuttoqartoq.
- Inuit Ataqatigiinni isiginnaaginnarnianngilarput inuiaqatigiit toqqissisimanngissutaannik isiginngitsuusaarinninneq. Inuiaqatigiipparujussuit alloriarfiunialersumut qulaatiinarneqartutut misigalutik aalassassimaartut aalajangiisussanit ilisimaneqarput, aamma aalajangiisussat takorlooreersimassavaat piffissap ingerlanerani nipangeriartuaartoqarnavianngitsoq, innuttaasut taasitinneqarnissaannut siunnersuummi IA tunngavilersuivoq.
Amerlanerussuteqartut oqartussaaqatigiipput
Naalakkersuisuniilli tamanna ajornartorsiutitut isigineqanngilaq.
- Kalaallit Nunaanni amerlanerussuteqartut oqartussaaqatigiippugut, qinersisartut inuit Inatsisartuni qinersisartut soqutigisaannik isumaginnissinnaanerpaasorisatik qinertarlugit. Tamanna aamma isumaqarpoq, qinersisartut Inatsisartuni ilaasortat, amerlanerussuteqartut tungaanniit akuersaanngilluinnarnissamut tunngaviusup atorunnaarsinneqarnissaanut tapersersuisut, qinersimagaat, Erik Jensen (S) akissuteqarluni allappoq.
- Akuersaanngilluinnarnissamut tunngaviusup atorunnaarsinneqarneraniilli marloriarluni Inatsisartunut qinersisoqarpoq, 2014-imi aammalu 2018-imi. Piffissami tassani urani pillugu innuttaasut taasitinneqarnissaannut tunngatillugu apeqqut arlaleriarluni oqallisigineqartarpoq. 2016-imi upernaakkut ataatsimiinnerup nalaani immikkoortut marluk urani pillugu innuttaasunik taasititsinissamik kissaateqarnermik imaqarput. Tamatigut siunnersuutit Inatsisartuni itigartinneqartarput.
- Innuttaasunik taasititsinikkut suliassanik ataasiakkaanik aalajangiisarneq nunatsinni ileqqorinnginnatsigu, tamatumunnga tamanna pissusissamisoortumik nangissutaasutut Naalakkersuisut isigaat.
- Ammasumik, kinaassusersiunngitsumik aamma oqartussaaqatigiinneq eqqarsaatigalugu
Inatsisartuni ilaasortat 31-usut innuttaasut aalajangereersimagaat, Erik Jensen (S) isumaqarpoq, tikkuarlugulu innuttaasut taasitinneqarnissaat pillugu Peter Olsenip (IA) ukiakkut 2016-imi siunnersuutaa oqaluuserineqareersoq.
- Naalakkersuisut isumaqarput akuersaanngilluinnarnissap atorunnaarsinneqarnissaa pillugu apeqqutip politikkikkut isumagineqarnera ammasumik, kinaassusersiunngitsumik aammalu oqartussaaqatigiinneq eqqarsaatigalugu ingerlasimasoq.
- Inatsisartut akuersaanngilluinnarnissap atorunnaarsinneqarnissaa pillugu aalajangiinissaat sioqqullugu, tamatuma nalaani, tamatumalu kingorna paasititsiniaanerit, innuttaasunik ataatsimiititsinerit il.il. ingerlanneqarput, aammalu uranimik isumannaatsumik aatsitassarsiorluni misissuineq piiaanerlu pillugit najoqqutassat annertoorujussuit suliarineqarput, taakkualu soqutiginnittunit tamaginnit suli pissarsiarineqarsinnaapput.
Aatsitassarsiorfiit ataasiakkaat avatangiisit peqqinnissarlu pillugit ersarilluinnartunik piumasaqaatitaqartartut Naalakkersuisup erseqqissarpaa.
- Oqaatigineqareersutut, uranitalinnik piiaanissaq pillugu innuttaasut taasitinneqarnissaannut oqartussaaqatigiinnikkut tunngavissaqartoq Naalakkersuisut isumaqanngillat. Kisiannili – uranimik aatsitassarsiorluni misissuinissamut piiaanissamullu akuersissummut atugassarititaasut pillugit, aammalu qaqugukkut innuttaasunik taasititsinikkut apeqqut aalajangiiffigitinneqarpat inissaminiinnersoq .