urandebat
Urani pillugu taasinermut nassuiaat aajuna
Sisamanngormat Inatsisartuni, 31-nik ilaasortalimmi, taasisoqarnerani 29-t taasipput. Aajuna nassuiaatissaa
Aatsitassarsiornermi urarnimut atortussiassanullu allanut radiop qinngornerinik ulorianartunik akulinnut akuersaanngilluinnarnerup atorunnaarsinneqarnissaanik taasinermi eqqumiiginarsinnaavoq taasisut 29-ummata, Inatsisartunut ilaasortat 31-usut.
Tamatumunnga nassuiaatissaavoq Siumumeersoq Kim Kielsen aamma Inuit Ataqatigiinneersoq Kuupik Kleist ´taaseqataannginnissamik´ isumaqatigiissuteqarsimammata, pissutigalugu IA-p siulittaasua taasinerup nalaani Nuummiinngimmat.
Tamatuma kingunerisaanik Naalakkersuisut tunngaviusumik aalajangiivigisassatut siunnersuutaanut 15-it isumaqataallutik taasipput 14-illu akerliullutik taasillutik.
Taamaasilluni Kim Kielsenip Kuupik Kleistillu taaseqataannginnissamik isumaqatigiissuteqarnerat pissutigalugu ilaasortanit 31-nit taasisinnaasut 29-iinnaapput.
– Taaseqataannginnissamik isumaqatigiissutikkut siunertaavoq Inatsisartunut ilaasortanut, sulinngiffeqarallarnertik imaluunniit allanik pissuteqarlutik Inatsisartut ataatsimiinnerini peqataasinnaanngitsunut, sinniisunik qaaqqusisarnissamik pisariaqartitsinerup killilersimatinnissaa, Inatsisartut Allattoqarfianni attaveqarnermik sulisoq Nils Baum oqaluttuarpoq.
Taasisunik oqimaaqatigiinnginneq naligiissarlugu
– Taamaasilluni aaqqissuussinikkut taasisunik oqimaaqatigiinnginneq naligiissarneqarpoq, tamanna pilersarmat Inatsisartuni gruppini assigiinngitsuni ilaasortat ilaat peqanngikkallaraangata. Tamanna anguneqartarpoq gruppit attorneqartut isumaqatigiissuteqarnerisigut, taamaasilluni gruppimit allamit ilaasortaq peqanngippat gruppimi allami ilaasortaq taaseqataassanani.
– Takussutissiami (allaaserisap qulerpiaani) rækkimi siullermi saamiatunbgaani toorneq qasertoq Inatsisartut siulittaasusata Lars-Emil Johansenip issiavigaa, taannali ataatsimiinnermik aqutsisup inaanit taasivoq. Rækkimi siullermi tullianilu toornerit qasertut Naalakkersuisunut ilaasortat issiavigaat, Naalakkersuisullu siulittaasuat Aleqa Hammond kisimi Inatsisartunut ilaasortaammat Naalakkersuisunut ilaasortat allat taasisinnaanngillat. Rækkimi kingullermi talerpiatungaani toorneq rigsombudsmandip issiavigaa, taannalu aamma taasisinnaanngilaq, Nils Baum Sermitsiaq.AG-mut oqaluttuarpoq.