Urani pillugu siunnersuut sakkortuumik isornartorsiorneqartoq
Naalakkersuisoqatigiinnit inatsisissatut siunnersuummit nutaamit uranimik piiaanissaq pinngitsoortinneqassaaq. Ingerlatsisut arlallit missingiut, tusarniaassutigineqartoq, qularnartoqartippaat. Kingunerisassai ernummatigineqarput. Partiip ukiorpassuarni naalakkersuisuutitaqarsimasup Siumup akuersaanngilluinnarneq atuutilerseqqinneqassagaluarpat atorunnaarseqqikkusussaneraa nalunarpoq.
- Naalakkersuisut siunnersuut aqqutigalugu aningaasatigut pissarsiassat annikinnerulersippaat. Tamanna isumaqarpoq, aatsitassat aatsitassanillu ujaasinerup Namminersorlutik Oqartussanut inuussutissarsiornermi sukarsuartut napatitsissutaanaviannginneranik.
Siumup siulittaasu Erik Jensen Naalakkersuisut siunnersuutaannut, tunngavippiaatigut uranimut akuersaanngilluinnarnerup atuutilerseqqinnissaanik siunertaqartumut, atatillugu ersarissumik oqaaseqarpoq. Akuersaanngilluinnarneq, 2013-imi atorunnaarsinneqartoq taamanimiillu Kalaallit Nunaanni politikkimi akerleriissutaasorujussuusimasoq.
Illuatungiliuttuni partiit annersaat, Siumut, atorunnaarsitsinermut tunuliaqutaavoq Naalakkersuisullu aatsitassanut politikkimi sangujoraarnerannik inuussutissarsiummut ajoqutaasumik Kalaallit Nunaatalu aningaasaliisartuni isigineqarneranik ajoqutaasumik isornartorsiorlugit.
- Kalaallit Nunaata nunanut allanut tunngasuni sangujoraartumik ingerlatsinissaq atorfissaqartinngilaa. Aatsitassarsiornermi ingerlatanik aallartitsinerit akisuujupput. Aatsitassanut inatsit Kalaallit Nunaannut suliffissanik akileraarutitigullu isertitanik qulakkeerinnippoq. Tamanna imminut napatittumik aningaasaqarnissatsinnut pisariaqartipparput, Erik Jensen oqarpoq.
Siumulli inatsit nutaaq partii pissaanermik tigumminnittunngoqqissappat atorunnaarsikkumassaneraa oqaatigissallugu suli siuppallaarpoq, partiip siulittaasua naapertorlugu.
Sulisitsisut: Piginnikkunnaarsitsinermut nallersuuttoq
Sulisitsisuni uranip inerteqqutaalersinnissaa pillugu inatsisissatut siunnersuummi ajornartorsiutit pingaarnerit marluk takuneqarsinnaasut, allattoqarfiup pisortaa inatsisilerinermilu siunnersorti, Karsten Lyberth Klausen paasissutissiivoq.
Siullertut aningaasaliiumassuseqarnermut pitsaanngitsumik sunniuteqassaaq, siunnersuut Kalaallit Nunanni aatsitassaqarneranik misissueqqissaarinernut aningaasaliinissamut sinaakkutissat pillugit nalornisoornermik pilersitsimmat. Sulisitsisunit tassunga atatillugu pingaartumik paragraffit 2 aamma 3, pinngoqqaatit qinngornernik ulorianartunik akullit piiarneqarnissaannik Naalakkersuisut inerteqquteqarsinnaatitaassutigiligassaat kiisalu ujaasinernut, misissuinernut piiaanermullu akuersissutit tunniunneqarsimasut annikillisinnissaannut utertinnissaannulluunniit periarfissaqalissutigisaat.
Allaaserisaq tamaat uani AG-mi atuaruk: