Urani pillugu qallunaat-kalaallit nutaamik suleqatigiissitaliussapput

Kalaallit Nunaat uranimik piiaalersinnaanngilaq avammulluunniit tuniniaalersinnaanani tamassuma qanoq ingerlanneqarnissaanik Danmarkimik suleqatigiinnissamik isumaqatigiissuteqaqqaarani, Danmarkip nunanut allanut ministeria Villy Søvndal, SF, taamatut oqarpoq pingasunngormat qallunaat-kalaallit urani pillugu suleqatigiissitaliaata nalunaarusiaata Folketingimi Det Udenrigspolitiske Nævn-imi ataatsimiissutigineqarnerata kingorna.
– Isumaqatigiittoqarpoq isumaqatigiinngitsoqarlunilu. Ataatsimut nalunaarusiorsinnaasimavugut pissutigalugu aamma isumaqatigiittoqarmat, Villy Søvndal oqarpoq.
Kalaallit Nunaanni aatsitassat allat assiginagit aatsitassanik uranimik akulinnik piiaanissaq qallunaat kunngeqarfiata oqartussaaffigaa, nalunaarusiami nutaami 80-inik quppernilimmi allassimavoq.
Suleqatigiissitaliap nunani tamalaani malittarisassat qulakkiissavai
Suleqatigiissitaliap qulakkiissavaa uranimik ingerlatsinissap nunani tamalaani malittarisassat qaffasinnerpaat malillugit pissasoq, Villy Søvndal erseqqissaavoq.
Uranimik saniatigut tunisassiatut akuersaannginnermik taaneqartup Inatsisartunit atorunnaarsinneqarpat kalaallit-qallunaat suleqatigiinnissamut gruppiannik pilersitsisoqassaaq.
Ilisimaneqanngilaq Nunatsinni uranimik piiaanissaq qallunaat naalakkersuisuisa unitsissinnaaneraa unitsinniarneraaluunniit.
– Tamanna qallunaat naalakkersuisuisa maannangaaq suli isummerfigisimanngilaat. Eqqortumik tulleriiaarineq tassaavoq Kalaallit Nunaata avataanit tatineqarani aalajangeeqqaarnissaa, Villy Søvndal erseqqissaavoq.
– Oqartussaasutut akisussaaffik annertoorujussuuvoq. Kialuunniit akuersaarsinnaanngilaa qallunaat peqqissaannginnerisigut urani inunnut eqqunngitsunut pinissaa. Qularutiginngilara tamatumunnga atatillugu kalaallit-qallunaat ataatsimut soqutigisarigipput issittumi sunnertiasumi pinngortitap, avatangiisit inuillu illersorneqarnissaat, Villy Søvndal oqarpoq.
Atuaruk: "Naalakkersuisut: Akuersaannginnerup atorunnaarsinnissaa sioqqullugu isumaqatigiittoqanngilaq"
Atuaruk: "Thorningip urani pillugu nalunaarutaa IA-p tipaatsuutigaa - Siumut kamappoq"
IA tunuliaqutaralugu folketingimut ilaasortap Johan Lund Olsenip, nunanut allanut ministerip oqartussaaffiup avinnissaanik isumannaatsuunikkut politikkimik paasinninnera taperserpaa.

– Nuannaarutigaara paasigakku nalunagulu Atlantikup illuini tamani isumaqatigiissutaasoq isumannaatsuunikkut, illersornissakkut nunanullu allanut politikkimi aporfissaqarmat, uranimik piiaasoqalissappat avammullu tuniniaasoqalissappat. Tamanna nutaarluinnaavoq, Johan Lund Olsen oqarpoq.
– Nuannaarutigaajuk Danmarki sunniuteqarmat Kalaallit Nunaata nalinginnaasumik nammineq aalajangiiffigerusutaanut?
– Urani aatsitassaavoq immikkoorluinnartoq. Uulia, gassi saviminissallu aporfissaqanngillat, soorlu ministeriuneq Folketingimi ammaanersiorluni oqalugiarnermini oqartoq. Uranimik piiaasoqassappat piiaanissaq avamullu tuniniaanissaq immikkut illuinnartuuvoq, pissutigalugu sakkunik atomitortunik siammarsaannginnissamik nunani tamalaani isumaqatigiissuteqartoqarnera, Johan Lund Olsen akivoq.
Folketingimut ilaasortap Doris Jakobsenip, Siumut, nalunaarusiaq nuannaarutigaa, imarisaali tamaat isumaqatiginagu.
– Oqarusunngilanga qallunaat kisimik oqartussaaffigigaat. Ataatsimoorussassaraarput. Kalaallit Nunaat Danmarkilu naligiissuussapput imminnullu ataqqissallutik. Tamatumunnga pisariaqarpoq ataatsimut aaqqiissutissamik nassaarnissaq, Doris Jakobsen erseqqissaavoq.

Nalunaarusiaq nutaaq Naalakkersuisut kissaatigisaat malillugu Nuummi Københavnimilu ataatsikkut tamanut saaqqummiunneqarpoq.