Narsaq
Urani pillugu oqallinneq pikkunaatsoq illersuisunit akerlilerneqarani
Illuinnarsiortumik oqallittoqarpoq sisamanngormat unnukkut Narsami innuttaasunit uranimik piiaanissaq oqallisigineqarmat
Sisamanngormat unnukkut Narsap katersortarfiani uranimut aatsitassanullu allanut radiop qinngorneranik ulorianartunik akulinnut saniatigut tunisassiatut akuersaannginnerup atorunnaarsinneqarnissaanik paasissutissiilluni ataatsimiititsisoqarpoq.
Ataatsimiinneq aaqqissuunneqarsimavoq IA tunuliaqutaralugu Inatsisartunut ilaasortanit Sara Olsvigimit, Kalistat Lundimit Aqqaluaq B. Egedemillu, naluneqanngitsutullu taakkua uranimut akerliupput.
Narsarmiut 120-t missaanniittut takkupput Kuannersuarni uranimik piiaaffeqalissappat tamanna tusarniarlugu apeqquteqarfiginiarlugulu, kiisalu tusarniarlugu Inuit Ataqatigiit tamatumunnga politikkiat.
Politikerit IA-meersut taakkua pingasut oqaluttuarput akuersaannginnerup atorunnaarsinnissaa Kalaallit Nunaannut tamarmut atuutissasoq, Narsamuinnaanngitsoq Kujataanuinnaanngitsorlu.
Ilanngullugu oqaluttuarput siunnersuutip Inatsisartuni oqaluuserineqarnissaa soqutigineqartorujussuusoq, Danmarkimiinnaanngitsoq aammattaarli nunanit allanit.
Atuaruk: "Narsami urani pillugu oqallinnissaq nutaaq"
Atiuaruk: "Siumut: Ersisaariunnaarniaritsi, IA"
Apeqqutit akissutaallu
Innuttaasoq, peqqinnissaqarfimmi sulisoq, oqaluttuarpoq paasisinnaanagu Naalakkersuisut aatsitassarsioqatigiiffiillu oqarmata uranimik piiaaneq uloriananngitsoq.
Taanna napparsimmavimmi qinnguartaassagaangami inimit qinnguartaaffimmit anissaaq imaluunniit aqerlulimmik oqimaatsumik atallaalertarluni, radiop qinngornerinik ulorianartunik qinngorfigitikkumanani.
Allap aamma maluginiarsimavaa aatsitassarsioqatigiiffimmi sulisut misiliilluni qillikkanik sulisut anersaartuuteqartartut illersuutinillu aaqqateqartartut.
– Sooq taamaasiorpat tamanna uloriananngilluinnarsimappat, taanna aperivoq.
Innuttaasut allat marluk tikkuarpaat Kujataa suliffissanik amigaateqartoq.
Taakkua apeqqutigaat Kuannersuarni aallartitsisoqassanngippat IA-p taarsiullugu suut neqeroorutigisinnaanerai. Tamatumani akineqarput nunalerinermit nerisassanillu tunisassiat annertusarneqassasut piareersarneqartarlutillu.
Innuttaasup ataatsip apeqqutigaa urani Kuannersuarnit piiarneqartoq nalinginnaasumik sumut atorneqarsinnaanersoq. Tassanilu akineqarpoq nukissiorfiit sakkutuullu taassuminnga pisisartuusut.
Tusarnaartut marlussuit annertunerusumik paaserusuppaat illersornissakkut sunniutit, aammalu atortussiassanik uranimik akulinnik piiaanermi akusersaannginnerup atorunnaarsinneqarneranut atatillugu Nunatta Danmarkillu oqartussaaaqatigiinnerat.
Uranimik piiaanissamik illersuisut takkutinngillat
Akerliliinermut qaninnerpaapput narsarmiut utoqqaat marluk, 1950-ikkunni inuusuttuullutik misileraavimmi Risømi atortussiassanik uranimik akulinnik suliaqarsimasut. Maannalu ukiut 70-it sinnerlugit ukioqalereerlutik suli peqqissuusut. Taamaattumik urani annikitsoq taama ulorianartigisinnaanngilaq, taakkua oqarput.
Tamatumunnga politikerit IA-meersut akipput piffissami killilimmi qillerinikkut msissugassanik tigusillatsiarneq selskabersuullu nunat tamalaaneersup ukiumut atortussiassamik tonserpassuarnik piiaanissaa assigiinngissuteqartorujussuusut.
Tusarnaartup ataatsip paaserusuppaa uranimik piiiaanissaq IA-p akuersaassaneraa, piiaaffik najugaqarfimmit ungasissumiissappat. Tassani akissut ersarippoq. Partiip illua'tungiliuttup Nunatsinni uranimik piiaanissaq akerlerilluinnarpaa.
Ataatsimiinneq akunnernik pingasunik sivisussuseqarpoq.