taasititsineq
Urani pillugu inuit taasisinneqarnissaat Steen Lyngep kissaatigaa
Inatsisartunut ilaasortaq nuimasoq Steen Lynge, Inatsisartuni siunnersuutissamik piareersaavoq, taanna urani pillugu inuit taasisinneqassanersut tikkuussissaaq
Atassummi siulittaasuusimasup, Gerhardt Petersenip, 2013-imi inuit uranimut taasisinneqarnissaat naaggaarpaa.
Inuit taasiteqqaarnagit naaggaarluinnarnermut politikkip atuutsinneqarunnaarnissaa Inatsisartuni taamaallaat suliarineqassasoq, Gerhardt Petersen taamani isumaqarpoq.
Atuaruk: Innuttaasut taasitinnissaat Atassutip tapersinngilaa
Innuttaasut aperinissaat pingaarutilik
Partiimilli nipi maanna allaavoq. Partiip siuttorisimasaa Steen Lynge (A), tamanna pillugu inuit taasisinneqartariaqartut ullumikkut isumaqarpoq.
- Innuttaasut aperinissat pingaaruteqarpoq, apeqqut taanna inuiaqatigiit soqutigisarimmassuk. Innuttaasut akornanni isumaqatigiinngittoqarpoq, taakkulu tusaasariaqarpagut, Atassummeersoq Nuuk TV-mut sisamanngormat oqarpoq.
Nuna tamakkerlugu taasineq
Steen Lynge Inatsisartuni siunnersuutissamik maanna piareersaavoq. Taassuma upernaakkut ataatsimiinnermi, Inatsisartut inuit taasisinneqassanersut aalajangiinissaat siunnersuutiginiarpaa
- Urani pillugu inuit taasisinneqarnissaat kissaatigiuaannaarnikuuara. Innuttaasut tamarmik pineqartumi najukkamiittuinnaanngitsut taasitinneqarnissaat pitsaanerpaassaaq, taanna illoqarfiit pingaarnersaata tv-anut oqarpoq.
Aleqa Hammondip (S) naalakkersuisooqatigiivisa nalaani neriorsuutigineqarpoq, urani pillugu najukkami inunnik taasititsisoqassasoq.
Taamatut neriorsuuteqarneq ingerlateqqinneqanngilaq, Kim Kielsenillu (S) naalakkersuisooqatigiivinit tamanna malinneqanngilaq.
Ilanngutassiaq tamaat uani Nuuk TV-mi takuuk
Atuaruk: Jess Svane: Uranip innuttaasunut taasissutigitinnissaa tapersersorpara