Urani Naami innuttaasunik siumoortumik ataatsimiisitsisoq

Urani Naamik Naalakkersuisut februaarip tallimaani Kuannersuarni aatsitassarsiornissaq pillugu innuttaasunik pisortatigoortumik ataatsimiisitsinnginnerani marloriarluni innuttaasunik ataatsimiisitsisimavoq.

Atorfilittat, Greenland Minerals ilisimatusartullu sumiiffinni tallimani pisortatigoormik innuttaasunik ataatsimiisitsinissamut peqataajortullutik Kujataanut suli tikinngitsut, peqatigiiffik Urani Naamik Qaqortumi Narsamilu innuttaasunik Kuannersuarni aatsitassarsiornissaq pillugu ataatsimiinnissamut qaaqqusisimavoq.

- Taamaaliorpugut, isumaqaratta innuttaasut aatsitassarsiornissaq pillugu naammattumik paasissutissinneqarsimanngitsut, Urani Naamik Narsami siulersuisunut ilaasortaq Grethe G. Nielsen oqarpoq.

Inuit ilaasa innuttaasunik ataatsimiisitsineq tassaasoq inuiaqatigiinnut paasissutissiinissamut periarfissaasoq tunngavilersuutigissajunnarsivaat, Urani Naamimili isumaqarpugut. ataatsimiisitsinissani Greenland Mineralsip paasissutissaatai kusassagaassangatippavut.

- Greenland Mineralsip innuttaasunik ataatsimiisitsinissaa tutsuiginngilarput. Aatsitassarsiornissaq pissusiviusunit pitsaanerunerusutut takutinniarsarissavaat, Grethe G. Nielsen oqarpoq.

Paasissutissat qularnartut

Arfinginngornermi ulloq 30.1.2031 Qaqortup katersortarfiani innuttaasunik ataatsimiisitsisoqarpoq.

Piareersaqqaarani innuttaasunik ataatsimiisitsinermi apeqqutigineqartut ilagaat, imeq errortuutikoq, pujoralaat qinngornerillu radioaktiviusut pillugit itisiliisumik misissuisimanerit tutsuiginartuunersut.

Greenland Mineralsimit siusinnerusukkut piumasaqaataanikuuvoq, piviusut aatsitassarsiornissaq pillugu oqallinnermi atorneqassasut, nalunaarusiamilu hunnorujulikkaanik quppernilimmi kikkunnit tamanit pissarsiarineqarsinnaasumi sammineqarsimasut pillugi paasissutissaqannginnermik oqaluttoqannginnissaa kissaatigisimallugu.

Oqallinneq ilaatigut kusanaattartoq

Greenland Mineralsip aningaasarsiorniarluni aatsitassanik nunarsuarmut aatsitassanik qaqutigoortunik pilerigineqaqisunik pilersuisussanik piiaanissamut akuersissummik tunineqarnissamut kissaateqarnerani, Grethe G. Nielsen uppernarsarpaa peqatigiiffitsik aamma anguniagaqartuusoq.

- Uranimut akerliuvugut, soorunami inunnut uumasunullu qanoq ulorianartiginera oqaluttuarerusupparput, taanna oqarpoq.

Grethe G. Nielsenip uppernarsarpaa, oqallinneq aappaatigut misigissutsinit illuatigullu aningaasannanniarnemit sunnerneqarsinnaasartoq, taamaammallu eqqortunik paasissutissiinissaq pingaaruteqartoq.

- Siulersuisutta eqqummaariffigilluinnarpaat, innutaasunik ataatsimiisitsinermi ilisimasat nassaarineqarsinnaasut tunngavigalugit paasissutissiisoqarnissaa. Siulersuisut paasissutissanik eqqunngitsunik tunniusserusunngillat, taanna neriorsuivoq.

Powered by Labrador CMS