Urani innuttaasullu taasitinneqarnissaat pillugu Politiken allaaserinnereersoq Olsvig nassuiaateqarpoq

"Kalaallip politikerip nuimasuup innuttaasunik taasititsinerup inernissaa soqutiginianngilaa".

Arfininngormat unnukkut Politiken.dk-mi allaaserisaq taamatut qulequtaqarpoq.

Allaaserisami allassimavoq Inuit Ataqatigiit ´aatsitassarsiornermi uranimik saniatigut tunisassiornissap innuttaasunut taasissutigineqarnissa´ piumasarigaat. Taasisitsinerli qanorluunniit inerneqassagaluarpat IA-p piiaaffiit annersaat mattunniaraa´- tassalu GME-p Kuannersuarni aatsitassarsiornermik suliniutaa.

Allaaserisaq uissuumminartoq, tassani Siumumit qinigassanngortittup Julie Rademacherip aamma Greenland Minerals and Energyp pisortaanerata John Mairip Inuit Ataqatigiit siulittaasuat Sara Olsvig sakkortuumik isornartorsiorlugu, nettimi inuit naapittarfiini sammineqartorujussuanngoreersimavoq.

Sara Olsvigilli malugeqquvaa Politiken-ip PS-imik immikkoortuani allaaserisaq siulleq Politiken.dk-mi allaaserisamit ´kusassarneqarnerusimasoq´.

Aatsitassarsiornermut aporfiusinnaapput

– Inuit Ataqatigiit innuttaasunik taasisitsiniarput, pissutigalugu urani pillugu innuttaasut isumaat paaserusukkatsigu. Innuttaasummi taasitinneqarneranni tamannarpiaq siunertaavoq, tamannalu aamma Politiken-imut erseqqissarsimavara. Nuna tamakkerlugu innuttaasunik taasisitsiniarpugut, urani stoffillu radiop qinngorneranik ulorianartunik akullit pillugit. Aallaavigaarput akuersaanngilluinnarnermi naleqassutsimut killissarititaq, tassa 60 PPM. Naluneqanngitsutut tamatumuuna aatsitassanik annertuumik piiaasoqarsinnaavoq, Sara Olsvig Sermitsiaq.AG-mut oqarpoq.

– Aamma ilisimaneqartutut siunnersuutigisimavarput sammisassaqartoq aatsitassanik ingerlatsiffiussanngitsunik, inuussutissarsiutilli allat pingaartippavut inissaqartikkusullugillu. Nunalerineq, aalisarneq imminullu pilersornerulernissamiq pingaartilluinnarpavut, kissaatigaarpullu inuussutissarsiutit tamakku siuariartornissamut periarfissaqassasut, immaqalu ataasiakkaat aatsitassarsiornermut aporfiusinnaapput, Inuit Ataqatigiit siulittaasuat itisiliivoq, tikkuarlugulu isertuussaanngitsoq partiip urani akerlerimmagu.

Rademacher: Uppernanngilaq

Inuit Ataqatigiit "aatsitassarsiornermi uranimik piiaanissamut innuttaasunik taasisitsinissamik piumasaqaateqarneranik inerneralu qanoq ittuussagaluarpat piiaaffissat annersassaannik IA-p mattussiniarneranik" qallunaat aviisiata Politiken-ip allaaserinninneranut atatillugu Siumumeersoq Julie Rademacher Politiken-imut ilaatigut oqarpoq:

– Uppernarpasinngilaq Olsvigip suleqatigiinnissaq oqaluuserimmagu, aalajangiusimallugu matumani inuit qanoq isumaqarenerat tusaaniarumanagu.