Uran: Atorunnaarsitsinermut Randi akerliuvoq
Partii Inuit Inatsisartuni ilaasortaat Randi Broberg uranimut naaggaarluinnarnerup atorunnaarnissaanut akerliuvoq
- Apeqqut taama annertutigisoq nalorninartoqartigisorlu, ingammik atorunnaarsitsinerup kingunissai suunersut ilisimanagit akueriinnarsinnaannginnakku akerliuvunga.
Partii Inuit sinnerlugit inatsisartuni ilaasortaq Randi Broberg Sermitsiaq.AG-mut taama nalunaarpoq napparsimalluni Inatsisartuni ataatsimeeqataanngikkaluarluni. Taamaammat uranimut naaggaarluinnarnerup atorunnaarnissaanut oqallinnermi inatsisartut ataatsimiittarfianni peqataanngilaq.
Tupannartoq: Uranimut naaggaarluinnarneq ullumi atorunnaarsippaat
Kim Kielsen Siumut aamma Partii Inuit sinnerlugit siunnersuummut oqaaseqaammik saqqummiussisuuvoq. Taamaattoq siunnersuummut akerliunini Randi Brobergip aalajangiusimavaa.
Randi Broberg isumaqarpoq aalajangerneq siusippallaamik pisoq.
- Isumaqarama taama inuiaqatigiinnut avissaarutaatigitillugu inuiaat taasitinneqarunik pissusissamisoornerusoq, inatsisartut taasitinnissaaninngaanniit. Tamannalu inuiannik toqqissititsissasoq, Randi Broberg Sermitsiaq.ag-mut oqarpoq.
Randi Brobergip taama isummernini augustip qaammataani nalunaarutigaa sisamanngornermilu Sermitsiaq.AG-mut erseqqissarpaa taama isummersimanini aalajangiusimallugu.