Ups: Siumut kommunini tamani qinigassanngortitamik allattorsimaffiannik piffissaagallartillugu tunniussisimanngitsoq
Kommunimut qinigassanngortittut allattorsimaffiannik tunniussinissamut maarlunngornermi nalunaaqutaq ullup-qeqqa killissarititaavoq, kommunilli marluk Siumut sinnerlugu qinigassanngortissimasut allattorsimaffiannik tunniussisimanngillat. Qinersinermut ataatsimiititaliaq pisoq aaqqiissutissarsiorniarlugu nalunaaqutaq marlunut ataatsimiissaaq.
Siumut marlunngornermi nalunaaqutaq 11.44 kommunimi ataatsimi qinigassanngortittut allattorsimaffiannik tunniussisimavoq. Tassalu Kommuneqarfik Sermersuumit. Partiip allattaata Bent Møllerip tamanna Sermitsiaq.AG-mut ilisimatitsissutigaa.
Taassuma qinersivinni tamani, tassa kommunini pineqartuni inatsit malillugu tunniunneqarsimanissaannut piumasaqaataasut immikkut oqaaseqarfigerusunngilai.
Kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit Inatsisartut inatsisaat normu 27
§ 15. Partii sinnerlugu qinigassanngortittut nalunaarutigineqarnerat qinersinermik siulersuisut partiinut nalunaarsuiffissatut allaffissiaatigut pisassaaq. Nalunaarut qinersivimmi qinersinermik siulersuisunut kingusinnerpaamik qinersinissaq sapaatit akunnerinik arfinilinnik sioqqullugu nal. 12.00 tunniunneqassaaq.
Sermitsiaq.AG-p paasissutissat pissarsiarisimasai naapertorlugit, Siumup kommunini marlunni allattorsimaffiutaat ullup-qeqqanut amigaatigineqarsimapput, Kommuneqarfik Sermersuumilli allattorsimaffiit pissarsiarineqarsimallutik.
Immikkut ittumik akuersisoqarsinnaasoq
Inatsit maleqqissaarneqassappat, nunami kommuninit tallimaasunit marlunni Siumut sinnerlugu qinigassanngortittut qineqqusaarsinnaatitaassanngillat.
Taamatulli ajortigisumik pisoqarnissaa ilimananngilaq. Kommunalbestyrelsinut, nunaqarfinni aqutsisunut ilagiillu sinniisaannut qinersisarneq kommunit qinersinermi aqutsisuinit aqunneqartarpoq, Qinersinermili ataatsimiititaliaq kommuninut qinersisoqarneranut atatillugu immikkut akuersissuteqartartutut naammagittaalliortarfittullu atuuttarluni.
Taakkuuppullu allattorsimaffinnik piffissaagallartillugu tunniussisoqarsimatinnagu immikkut akuersissuteqartussat. Ataatsimiititaliaq nalunaaqutaq marlunut ataatsimiigiaqquneqapallassimavoq.