bommert
UPS: Politikerit nalunaarsugaat amigaateqartut
Naak Mette Lyngep aningaasatigut soqutigisani ilisimatitsissutigereersimagaluarai Inatsisartut nittartagaanni taakkua ersinngillat
- Siullerpaajullunga immersugassamik immersuisuugunarpunga.
Taamak oqaluttuarpoq Mette Lynge, Ineqarnermut, Pinngortitamut Avatangiisinullu Naalakkersuisoq, Partii Inuit, Sermitsiaq.AG-mit aperineqarami sooq nammineq kajumissutsi aallaavigalugu nalunaarsuiffissaq immersorsimannginneraa. Immersugassaq taanna aallaavigalugu assersuutigalugu siulersuisuni ilaasortaaffiit politikkimillu ingerlatsinerup saniatigut aningaasanik isaatitsinerit takuneqarsinnaanissaat periarfissaammat. Transparency Greenlandip qinikkanut arlaleriarluni siunnersuutigisarpaat nalunaarsuiffissamik immersueqqullugit NGO-tut neriuutigalugu pinngitsoorani saqqummiussuunneqatalissasut. Ilaatigut politikerit aammasumik erseqqissumillu ingerlatsinerat innuttaasunut ersarissarumallugit. Ilaatigut matoqqasumik ingerlatsinermit pissutissaqarani ernumasoqalernissaa tatiginninngittoqalernissaa pinaveersaarniarlugit, politikerit namminneq soqutigisatik aallaavigalugit ersinngitsumik ingerlatsinnginniassammata.
Nittartakkami inatsisartut.gl immersugassat saqqummersinneqarput – tassa qinikkat immersuisimappata.
Mette Lyngemut tunngasumi allassimaffik imaqanngilaq tamannali piumassuseqannginnermik aallaaveqanngilaq. Suliamik ingerlatsinermi arlaanik kukkusoqarsimagunarpoq. Ineqarnermut, Pinngortitamut Avatangiisinullu Pisortaqarfimmi pisortaagallartup erseqqissaatigaa Mette Lynge immersugassamik immersuisimasoq.
Qinersivimmut kingullermut sanilliullugit politikerit immersugassanik immersuinerat pitsaanerulersimavoq. Taakkua atuarlugit soqutiginartuullutik. Ilaatigut takuneqarsinnaavoq Inatsisartuni ilaasortaaneq imaluunniit Naalakkersuisunut ilaasortaaneq atorfittut ilivitsutut nalilersorneqartoq ukiumut aningaasarsiaqartinneqarlutik, taamaakkaluartoq qinikkat saniatigut aningaasarsiorumasartut.
Lars-Emilip aktiaatai
Immersugassanik immersuisimasunit allattugaateqarnerpaaq tassaavoq Inatsisartut siulittaasuat Lars-Emil Johansen. Nunatsinni inatsisiliortunut siulittaasunngorlaatut sapaatip-akunnerini qaangiuttuni sammisarpassuarnik taamaatitsilluni ulapissimassaqaaq.
Lars-Emil Johansenip nalunaarsukkamini allappoq siulersuisuni siulittaasoqarfinni aningaasarsiaqarfigisani Upernavik Seafoodimi aamma East Greenland Oil taamaatillugit. Kulturfonden Danmark-Grønlandip siulersuisuini 2014 tikillugu ilaasortaavoq. Tamatuma saniatigut 50.000 koruunit sinnerlugit East Greenland Oilimi piginneqataassuteqarluni uuliamik ujaasinissamut marlunnik pisinnaatitsissutaateqartoq. Aktiat taakkua pigiunnaarniarlugit maanna suliaqarpoq. Ilisimatitsissutigaa inuttut ataatsitut suliffeqarfiutini Auro Aps. matuniarlugu suliaqarluni. Suliffeqarffiup immikkut ilisimasaqarfigalugu suliaraa ujaasinissamut suliffeqarfinnut aatsitassarsiornermilu suliniutinut aningaassaliisinnaasunik pissarsiniarnermi siunnersuinissaq.
Inatsisartut siulittaasuat allappoq maajimi Arctic Venture aallartitaqarfiani ilaasortaanerminit tunuarniarluni.
Sermitsiaq.AG filimi eqikkakkami politikerit immersugaat tamaasa katersorpaat. Tassaniipput immersugassat 27-t illit nammineq misissorsinnaasatit.
Fili allaaserisap uuma talerpianit aaneqarsinnaavoq.