Uppernarsarneqarpoq: USA-p nunanut allanut ministeria nunatsinnut tikeraassaaq
Amerikami nunanut allanut ministeri, Antony Blinken, nunatsinnut sisamanngorpat sivikitsukullammik tikeraassaaq. Tamanna amerikami nunanut allanut tunngasunut ministeriamit uppernarsarneqarpoq.
Nunanut allanut tunngasunut Naalakkersuisoq, Pele Broberg (N) aamma Naalakkersuisut siulittaasuat, Múte B. Egede (IA) amerikamiut nunanut allanut ministeriannik, Antony Blinkenimik nunatsinni ataatsimeeqateqartussanngorput.
Tamanna amerikamiut nunanut allanut tunngasunut ministeriaqarfiata tusagassiorfinnut nalunaaruteqarluni uppernarsaqqammerpaa.
Antony Blinken Arktisk Rådip Islandimi Reykjavikimi 19.-20. maj ataatsimiinneranni peqataassaaq. Soorlu aamma nunanut allanut tunngasunut Naalakkersuisoq, Pele Broberg peqataassasoq. Islandimi ataatsimiinnerup kinguninngua Antony Blinken Kangerlussuarmut tikissalluni pilersaaruteqarpoq. Kangerlussuarmi nunanut allanut naalakkersuisoq Pele Brobergip ataatsimeeqatiginerani nunatta amerikallu ataqatigiinnerat suleqatigiinnerallu oqaluuserineqassapput.
Naalakkersuisut siulittaasuata, Múte B. Egedep Antony Blinken Kangerlussuarmut tikippat tikilluaqqussavaa.
Suleqatigiinneq oqaluuserineqassaaq
Pele Brobergip Antony Blinken sisamanngornermi 20. maj ataatsimeeqatigileruniuk suleqatigiinnermut aningaasaliinermullu tunngasunik oqaloqateqarnissaminut periarfissaqarluarpoq. Antony Blinken akunnerni tallimani nunatsinniissaaq.
Kalaallit Nunaat aamma USA suleqatigiinnissamut 2020-mi isumaqatigiissuteqarput, soorlu aamma Pituffimmut isumaqatigiissut ukioq taanna atsiorneqartoq.
USA aamma Kalaallit Nunaat suleqatigiinnissamut isumaqatigiissuteqaramik aatsitassarsiorneq, takornariaqarneq, ilisimatusarneq ilinniartitaanerlu suleqatigiissutigissallugit isumaqatigiipput. Isumaqatigiissut nunatta aningaasaqarnerata ineriartorneranut iluaqutaassasoq taamani Naalakkersuisunut Siulittaasoq, Kim Kielsen oqarpoq.
Illersornissamut sillimaniarnermullu politikki danskit akisussaaffigigaluaraat, taamaattoq nunarput pineqartillugu Kalaallit Nunaat taaneqartuni sunniuteqarnerunissaa ataatsimiinnermi aamma oqaloqatigineqartussanut naatsorsuutigineqarpoq.
Naapinnissamut periarfissat arlallit
Amerikamiut nunanut allanut ministeriat Antony Blinken Danmarkimut ataasinngorpat 17. maj tikissaaq ataatsimiigiarluni. Nunanut allanut naalakkersuisoq, Pele Broberg, danskit nunanut allanut ministeriat Jeppe Kofod aamma Savalimmiuni nunanut allanut naalakkersuisoq Jenis av Rana ataatsimiinnermi peqataassapput.
Ulluni 19. aamma 20. maj Arktisk Råd Reykjavikkimi ataatsimiissaaq, tassanilu Antony Blinken aamma Pele Broberg aamma peqataassapput.
Amerikamiut angalaqatigiit Kangerlussuarmiinneranni ataatsimiinnermi peqataasut tamarmik Kangerlussuarmi ulluni tallimani mattusimaqqaassapput Nuummullu aallannginnerminni coronamut misissorteqqaassallutik.