Uppernarsarneqarpoq: Trumpip Kalaallit Nunaata pisiarineqarsinnaanera misissorpaa
Septembarip aallartinnerani amerikamiut præsidentiata Danmark tikeraassavaa, Donald Trumpip aamma Kalaallit Nunaat misissorpaa.
Ilumoorpoq. Amerikamiut præsidentiata, Donald Trumpip, Kalaallit Nunaata pisiarineqarsinnaanera misissorpaa.
Larry Kudlowip, Det Hvide Husimi aningaasaqarnermut siunnersortip tamanna uppernarsarpaa. Kudlowip oqarnera naapertorlugu, Trumpip allaffeqarfiata pisiarinnittoqarsinnaanera ”misissuleruttorpaa.
Amerikamiut nittartakkakkut nutaarsiassaqartitsivia The Hill naapertorlugu Fox News Sundayimut taama oqarpoq.
- Danmarkip Kalaallit Nunaat pigaa. Danmark iligaarput. Kalaallit Nunaat pilersaarusiorfimmi inissisimavoq. Aatsitassanik nalituunik peqarluarpoq.
- Præsidentip inissianik pisinermik ilisimasaqartup tamanna misissorusuppaa, taanna Foximi nutaarsiassanik saqqumiisartumut Dana Perinomut, The Hill naapertorlugu taama oqarpoq.
Trumpip tamanna isumaliutersuutigisimagaa, sapaatip-akunnerata ingerlanerani saqqummiunneqarpoq. Oqaluttuaq aviisimi Wall Street Journalimeerpoq, taanna tusarfinnit kinaassutsimik isertuussisuneerpoq. Kisianni allaaserisaq ilumoornerarneqarpoq.
Danmarkip Kalaallit Nunaata USA-mut tuninissaa, danskit politikerit annertuumik itigartitsissutigeerpaat. Septembarip aallartinnerani Trump Danmarkiliarpat, sammisaq oqaluuserineqassasoq naatsorsuutigineqarsinnaavoq.
USA-p siornatigut Kalaallit Nunaat pisiariniarlugu isumaliutersuuteqartareerpoq, nunap inissisimanerata politikkikkut pingaaruteqartorujussuunera pissutigalugu, ingammik Ruslandip issittortaanut tunngatillugu.
USA-p Alaska Ruslandimit pisiarimmagu, amerikamiut oqartussaat 1867-imi pisinermik suliaqarput.
Amerikamiut 1946-mi præsidentiata Harry S. Trumanip danskit naalakkersuisuinut Kalaallit Nunaat 100 millionit dollarilerlugu pisiariniarlugu saqqummiussaqarpoq.
Neqeroorut itigartitsissutigineqarpoq. Kisianni amerikamiut qeqertami sakkutooqarnertik attatiinnarpaat – minnerunngitsumik Pituffimmi, 1952-imi pilersinneqartumi.
Sakkutooqarfik USA-p rakettinut illersuutinik pilersitsinissaanut ullumikkut pingaarutilittut inissisimavoq.
Naalakkersuisut siulittaasuata, Kim Kielsenip, Kalaallit Nunaat tuniniarneqarsinnaanngitsoq, tallimanngormat naatsumik oqaaseqarluni oqaatigaa.
Kalaallit Nunaata folketingimut ilaasortaatitaata aappaata Aaja Chemnitz Larsenip (IA) aamma isumaliutersuut itigartippaa.
Ministeriunerup Mette Frederiksenip (S) maanna nunarput sapaammi ataasinngornermilu tikeraarpaa.
/ritzau/