Skip to main content

Upernaviup nunaqarfiini peqissaaviit sulisukinneri unammillernartoqarput

Peqqissutsimut Naalakkersuisoq Martha Abelsen (S) nunaqarfinni illoqarfinnilu tikeraarsimasamini akisussaaffimmik tiguseqataasoqarnissaa ujartortarpaa. Upernaviup nunaqarfiini unammillernartut ilagaat innuttaasut nakorsamut saaffiginnissimatillutik akissutissarsinissaminnut sivisusinnaasumik utaqqisarnerat.

Peqqissutsimut naalakkersuisup Upernavik nunaqarfiilu ilai septemberip aallartilaarnerani tikeraarpai. Unammillernartut tassani takuai, aammali aaqqiissutaasinnaasunik takunnissinnaalluni.

Peqqinnissaqarfimmi suliaqartoq sulinngiffeqarpat, Upernaviup nunaqarfiini sisamaasuni, Aappilattumi, Naajaani, Innaarsunni Tasiusamilu illu peqqissaavik matoqqatinneqartarpoq. Nunaqarfimmi innuttaasut piffissami aalajangersimasumi peqqissaavimmut qaninnerusumut toqqaannartumik attaveqarsinnaasanngillat.

Unammillernartorlu taanna sumiiffimmi tassaniinnaq nalaanneqartanngilaq, Martha Abelsen oqaluttuarpoq.

- Nunaqarfinni arlalinni piviusoq taama isikkoqarpoq. Nunaqarfimmi peqqinnissaqarfimmi sulisoq ataasiinnaagaangat, ilaatigut nakorsaatinik paarsisumik taamaallaat peqartoqaraangat, sulisoq sulinngiffeqartillugu napparsimatilluguluunniit, attaveqarniarneq ajornarnerusarpoq, Sermitsiaq.AG-mut oqaluttuarpoq.

Akisussaaqataaneq

Peqqinnissaqarfiup iluani sulisussanik piareersimasoqarnissamut isumat nutaat atorneqartariaqalerput. Peqqissutsimut naalakkersuisup erseqqissaassutigaa avataaniit tikittussanik utaqqiinnartoqartariaqanngitsoq, nunaqarfimmili innuttaasut peqqissaqarfiup iluani sulisussanik piareersaanermut aamma akisussaaffimmik tigusisariaqartut.

- Nunaqarfimmi aqutsisut piumaffigaakka najukkaminni peqqinnissaqarfiup iluani sulisussatut piukkunnarsinnaasunik soqutiginnittunillu ujartuissasut. Nassuerutigisariaqarparami taakkuummata sumiiffimminni najugaqartunik ilisimanninnerusut, najugaqavissunillu sulisussanik nassaarsinnaanerusut. Taava uagut tunngaviliissaagut pisariaqartunillu pikkorissaanerit ingerlatissallugit, oqarpoq.

Attaveqarniarneq kipiluttunarsinnaasoq

Innuttaasut illumut peqqissaavimmut nunaqarfimmiittumut saaffiginnikkaangata, tassanngaanniit inuit arlallit attavigeqqaarlugit nakorsamut saaffiginnittoqartartoq, naalakkersuisoq ilisimatitsivoq.

Innuttaasoq illumut peqqissaavimmut saaffiginnippat, tassani sulisup saaffiginnissut Upernavimmi peqqissaasumut tamakkuninnga suliaqartumut ingerlatissavaa. Upernavimmi peqqissaasup saaffiginnissut nakorsamut apuutissavaa. Nakorsallu saaffiginnissut nalilersoreerpagu akissut attaveqarnermi aqqut atorneqartoq atorlugu utertinneqassaaq. Saaffiginninnermi ataatsimi inuit pingasut saaffiginnissummik suliaqartarput, akissullu ulluni pingasuni utaqqineqarsinnaasarluni.

- Inuttaasumiit nakorsamut attaveqarniarnerup taama ittup qanoq pitsaatiginera apeqquserpara. Immaqa eqaannerusinnaavoq imaluunniit ajornannginnerusinnaalluni? Martha Abelsen apeqqusiivoq.

Ajornartorsiutaasinnaasoq tamanna nunaqarfimmi aqutsisut peqatigalugit aamma oqaloqatigiissutigaa, innuttaasullu nakorsamut attaveqarniartarnerat eqaannerulersinniarlugu aaqqiissutissanik siunnersuuteqarsinnaanersut pillugit isumassarsioqqullugit.

- Nunaqarfinni pissutsit periarfissallu pillugit nunaqarfinni aqutsisut uanniit ilisimasaqarnerupput. Taamaammat inissaminiippoq unammillernartut pillugit aaqqiissummik nassaarniarnermi peqataatinneqarnissaat. Imaassinnaasoq nunaqarfimmi qullersaasut, Nukissiorfinni, Pilersuisuni Peqqissaavinnilu suliaqartut issiaqatigiisillugit aaqqiissutissanik ujartuitinneqarsinnaasut arlalitsigullu suleqatigiinnerusinnaasut, soorlu peqqinnissaqarfimmut attaveqarniarnermi nutaanillu sulisussarsiornermi, oqarpoq.

Peqqinnissaq pillugu seminari

Inatsisartut peqqinnissaq pillugu oktoberip qiteqqunnerani serminarertinneqassapput. Peqqissutsimut naalakkersuisoq tamassuminnga aaqqissuisuuvoq. Innuttaasut peqqinnissaqarfinnut minnerpaamik sunik naatsorsuuteqarsinnaanersut oqallisigineqassaaq. Innersuussutigineqartut peqqinnissaqarfiup iluani aaqqissuusseqqinnernut ilanngunneqarsinnaassasut, naalakkersuisoq neriuuteqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER