Upernavimmi nioqqutissanik amigaateqartoqartoq

Royal Arctic Linep assartuutaata kinguaattooqanera Upernavimmi Pilersuisumut sunniuteqarpoq, nioqqutissat qerisut immuillu laktoseqatanngitsut pingaartumik amigaatigineqangaatsiarlutik. Innuttaasunulli nutaarsiassatsialaqarpoq.

Upernavimmi Pilersuisoq unammillagassaqarsimavoq, pingaartumik nioqqutissanut qerisunut immunnullu lactoseqatanngitsunut ilitsiviit imaqarsimanatik.

Pilersuisui pisortap Brian Weuge Chemnitzip tamanna Sermitsiaq.AG-mut uppernarsarpaa.

Brian Weuge Chemnitzip oqaatigaa, Pilersuisumi nioqqutissanik amigaateqartoqarneranut pissutaasoq, Royal Arctic Linep umiarsuaataata Vestlandiap kinguaattooqqasimanera.

Umiarsuaq assartuisartoq kinguaattooqqasoq

- Umiarsuaq sisamanngornermi oktobarip 15-iani Upernavimmut tikittussaasimagaluarpoq, taanna ilisimatitsivoq.

Inuuttaasunulli nutaarsiassatsialaqarpoq. Umiarsuaq ullumi sisamanngornermi tikissaaq illoqarfimmullu nioqqutissat tunniussinnaanngussallugit.

Cigaretsiutaarulluinnangajassimasoq

Avannaanili illoqarfimmi pujortartartunut piffissap ilaa pitsaavallaarsimanngilaq.

- Cigaretsit nungungajalluinnarsimapput, mentholitallit kisinngorussimagamik. Pisiniarfilli cigaretsinik timmisartukkut tikisitsisimavoq, taamaalilluni pisiniarfimmi maanna cigaretseqalersimavoq, Brian Weuge Chemnitz oqarpoq.

Powered by Labrador CMS