Upernavimmi 25-nik amerlanerusut tunillatsissimasut
Avannaata peqqissaaviani nakorsap ataasinngornermi ullup-qeqqanut ilisimatitsissutigaa, Upernavimmi sisanngornermiilli 25-t missaanniittut tunillatsissimavut. Taassuma ippigisaqartunut tamanut kaammattuutigaa, tunillatsissinnaasut amerlinnginnissaat anguniarlugu angerlarsimaannaqqullugit.
Upernavimmi sisamanngornermilli tunillatsissimasut 25-nik amerlanerupput. Avaannaani peqqissaaviup nakorsaa Peter VedstedSermitsiaq.AG-mut taamatut ilisimatitsivoq.
- Tunillatsissimasut maanna 25-t missaanniipput, misisukkalli inerneri suli takuttarput, taamaammat tunillatsissimasut amerliartorput, taanna oqarpoq.
Tunillatsittorpassuusimammata Upernavimmi Coronavirusi siaruaakkiartorpoq.
- Tunillaassuisut amerlarpasimmata, suminngaanniit tunillaassuisoqarnersoq oqaatigisinnaanngilarput, peqqinnissaqarfik tusagassiorfinnut nalunaaruteqarnermi ilisimatitsivoq.
Misissugassatut tiguneqarsimasorpassuit Nuummut nassiunneqarsimasut
Peqqinnissaqarfik Upernavimmi misissugassatut tiguneqarsimasuni siullernik misissueqqissaaleruttorpoq, misissugassatut tiguneqarsimasut silap ajornera pissutigalugu sapaatiummat unnulluinnartoq aatsaat Nuummut anngunneqarsimapput.
Taamaammat ataasinngornerup ingerlanerani tunillatsissimasut amerlanerunissaat naatsorsuutigineqarpoq Upernavimmi aamma akissutisianik misissueqqissaartoqartarpoq, tassani inuit ippigisallit misissugassatut tigusiffigineqarsimasut salliutinneqartarlutik.
Peter Vedstedip erseqqissaassutigaa, maannakkorpiaq ajornartorsiutaanerpaasoq tassaasoq, inuit ippigisallit inunnut allanut qanillinaveersaartannginnerat.
- Inoqarpoq napparsimasimasunik, ippigisaqaraluarlutik allanik peqateqartartunik. Tamatuma saniatigut meeqqerivinni atuarfinnilu akiuussutissalerneqarsimanngitsut akornanni tunillaassuisoqarpoq. Meeqqat napparsimanngikkaluarlutik allanik aamma tunillaasinnaapput, taanna nassuiaavoq.
Ippigisaqaruit allanut qanillinaveersaarit
Peter Vedstedip taammaammt inuit ippigisallit allanik peqateqannginnissaannik kaammattorpai.
- Tamannatuaavoq tuniluuttoqalernissaanik pinngitsoortitsisinnaasoq, taanna erseqqissaavoq.
Peqqinnissarfimmi inunnik ippigisalinnik tunillatsissimasunullu attaveqarsimasunik misissuineq ingerlatiinnarneqarpoq. Attaveqarsimasut tamarmik kaammattorneqarput, kingullermik attaveqarsimanerminnit ullut sisamassaanni ullullu arfineq-aappassaanni misissorteqqullugit.
Ataasinngornermi Upernaviup timersortarfissuani nalunaaqutaq 9-12 misissuisoqarpoq, nalunaaqutarlu 13-15 ammaqqissalluni.
Tuniluuttoqarnera siammatsaaliniarlugu pitsaanerpaamik iliuuserineqarsinnaasut tassaapput allanut qanillinaveersaarnissaq, qanermut assiaqummik atuinissaq eqqiluisaarluarnissarlu (assaat spritserlugit errorlugillu). Tamanna Coronavirusimut, RS-virusimut nualluummullu atuuppoq.
