Upernavik: Qernertanik qilalugartassiisoqarnera naammaginagu akerliussutsimik takutitsisoqarpoq
Upernavimmi eqqaanilu piniartunut 400-t missaanniittunut qernertanik qilalugartassiineq naammagineqanngilaq.
Qernertanik qilalugartassiinermut naammaginninnginneq suli annertusiartorpoq.
Tasiilami piniartut qernertanik qilalugartassiinermut naammaginnigatik oqariartuuteqareerput. Ilulissani piniartut naapertuunnerusumik agguaasoqarnissaanik aamma piumasaqareerput.
Upernavimmilu piniartut qernertanik qilalukkanik agguaanermut naammaginnigatik aamma akerliussutsimik takutitsipput. Akerliussutsimik takutitsineq ippassaq sisamanngornermi ingerlanneqarpoq, tassani piniartut piumasaraat naalakkersuisoq akisussaasoq piaarnerpaamik Upernavimmukassasoq, piniartunik naapitsiartorluni.
Pisassat
Upernavimmi nunaqarfiinilu piniartut allagartaqartut 400-t missaanniipput, taakkunannga 102-t Upernavimmi najugaqarlutik.
Naalakkersuisut qernertanik qilalukkanik aqutsiveqarfimmi tassani 38-inik pisassiipput, taakkunannga qulit Upernavimmi piniartunut agguaanneqassallutik.
- Qilalukkanik qernertanik Naalakkersuisunit pisassinneqarnertik piniartut naammaginngilaat, aqutsiveqarfimmi isorartummat. Qernertanik qilalugarpassuaqartoq erseqqissaassutigivaat, namminermi nalunnginnamikku tamanna, Avannaata Kommuniani kommunalbestyrelsemi ilaasortaq Aqqaluk Heilmann (PN) allakkani ammasuni taama allappoq. Allakkat ammasut aalisarnermut, piniarnermut nunalerinermullu naalakkersuisumut, Jens Immanuelsenimut (S) aamma Naalakkersuisut Siulittaasuannut Kim Kielsenimut (S) nassiunneqartutut allassimapput.
Kommunalbestyrelsemi ilaasortap allakkat Inatsisartuni aalisarnermut, piniarnermut nunalerinermullu ataatsimiititaliamut, Avannaata Kommuniani aalisarnermut piniarnermullu ataatsimiititaliami siulittaasumut kiisalu kommunimi borgmesterimut Palle Jerimiassenimut (S) ilanngullugit nassiussimavai.
Makitsineq
Naalakkersuisut aalajangerput aqutsiveqarfimmi Upernavimmi pisassiissutit immikkoortut paggatassiissutigineqassanngitsut, taamaattorli akuersissutit inunnut ataasiakkaanut imaluunniit piniaqatigiikkaanut tunniunneqassasut. Tamanna pissaaq makitsinikkut imaluunniit tulleriiaarinikkut.
- Pisassiissutit taama ikitsigitillugit makitsinissaq akerleraarput akuerinagulu. Aqutsiveqarfik Upernavik kisimi piujuaannartitsissanngilaq, piniartut akerliussutsimik takutitsisut akerliunertik takutinniarlugu taama allagartarsualiorsimapput.
- Kommunalbestyrelsemi qinikkatut kissaatigivara piniartut oqartussaaqataanermi oqariartuutaat naleqartinneqassasut, aalisarnermut, piniarnermullu naalakkersuisumik naapitsiumallutik piumasaqarnerat aamma ataqqineqassasoq, Aqqaluk Heilmann tusagassiutinut nalunaaruteqarluni allappoq.
Aqqaluk Heilmann tusagassiutinut nalunaarutimini ilanngullugu erseqqissarpaa piniartut naammaginninnginnerat pillugu oqariartuutaat oqartussanut anngunneqareersimasut, qisuariarfigineqanngippatalu tamanna sumiginnaanertut isigineqartariaqartoq.
Siulittaasunngorniunnermi ilanngunneqartoq
Qernertanik qilalugartassiisarnermut oqallinneq Siumumi siulittaasunngorniunnermi aamma akuliunneqarpoq. Siulittaasussatup sassartup Erik Jensenip Tasiilami qernertanik qilalugartassiineq qaammammi uani isornartorsiorpaa, naak ilisimatuut ernummatigigaluaraat qilalukkat qernertat Tunumi nungutaaratarsinnaanerat.
Biologit piniagassanik kisitsineranni piniartut peqataatinneqartalernissaat Erik Jensenip piumasarissallugu oqaatigaa.