Upernavik: Peqqinnissaqarfiup misissuisarneq akiuussutissalersuinerlu ukkatariunnaarpai

Ulluni kingullerni sisamani illoqarfimmi nunaqarfinnilu qulingiluani coronamik tunillatsissimasut 102-t paasineqarput. Taamaammat Naalakkersuisut nunatsinni nakorsaaneq isumasioqatigereerlugu aalajangerput, Upernavimmi nunaqarfiinilu periusissiamik nutaamik atuilerniarlutik.

- Upernavimmi inuit amerlasuut annilaanganerat paasisinnaalluarpara. Eqqaamassavarpulli Upernavimmi tamakkiisumik akiuussuserneqarsimasut amerlammata, taamaattumillu illoqarfik pisumut piareersimalluarpoq, Peqqinnissaqarfillu innuttaasut ajornartoorfimmiit aniguilluarnissaat anguniarlugu sapinngisartik tamaat ikiuutissaaq, taama oqarpoq Peqqinnissamut Naalakkersuisoq Kirsten Fencker.

Upernavimmi innuttaasut aqqanilinnik ukioqalereersimasut utoqqaallu 81 procentii tamakkiisumik akiuussutissalerneqarsimapput, nunaqarfiinili 38 procentimiit 65 procentit akiuussutissalerneqarsimallutik. Upernavimmi nunaqarfiinilu tamani innuttaasut aqqanilinnik ukioqalereersimasut 65 procentii marloriarlutik akiuussutissamik kapineqarsimapput.

Innuttaasut tamaasa isigissagaanni, innuttaasunit 2.779-iusunit 53 procentit akiuussutissalerneqarsimapput, Upernaviulli illoqarfiani innuttaasut pingasorarterutaat akiuussutissalerneqarsimallutik, tamannalu nunami akiuussutissalerneqarsimasut agguaqatigiissinnerannut naapertuuppoq, Nunatsinni Nakorsaaneq Henrik L. Hansen Sermitisaq.AG-mut oqarpoq.

Nammineq kajumissutsimik killilersuisoqassanersoq eqqarsaatigineqartoq

Upernavimmi nunaqarfiinilu tunillatseqqasut maanna 118-iupput. Tassa innuttaasut fem procentingajaat tunillatseqqapput. Tuniluunneq ima annertutigaaq innuttaasut tamarmik imminnut tunillatsissimasumut qanillisimasutut isigineqarsinnaallutik, Nalakkersuisut ilisimatitsipput.

Corona pillugu Allattoqarfik Avannaata Kommunia peqatigalugu nammineq kajumissutsimik sulisinnaanermik periarfissat pillugit oqaloqatigiipput.

Tassani pineqarput:

• Upernavimmi nunaqarfiinilu katersuunnissamut killilersuinerit
• Ulluunerani paaqqinnittarfiit matugallarneqarneri
• Atuarfinni tunillaassuinissamik pinaveersaartitsiniarluni suliniuteqarnerit

Corona pillugu suleqatigiit ullumi ataatsimiipput, Naalakkersuisunullu innersuussutigaat, Upernavimmi Upernaviullu nunaqarfiini tamani oqartussaasunik timmissartuussinermik atuutsitsisoqalissasoq (ilaasussat tamarmik oqartussaasunit akuerineqaqqaarlutik), taamaalilluni illoqarfimmi eqqaanilu imaluunniit nunap sinneranut tuniluunneq siaruarnissaa pinaveersaartinneqarluni.

Akiuussutissalersuisoqaranilu misissuisoqassanngitsoq

Tunillatsissimasumut qanillisimagaanni imalunniit tunillatsissimagaanni akiuussutissamik kapitinnissaq Peqqinnissaqarfinni akisussaasunit innersuussutigineqanngilaq, taamaattumillu maannakkorpiaq Upernavimmi akiuussusersuinissaq periarfissaanngilaq, soorluttaaq tuniluunnerup annertuallaarnera pissutigalugu innuttaasut misissorneqarsinnaanngillat, Naalakkersuisut ilisimatitsipput.

- Piffissaq sivikitsoq Upernavimmi nukiit allatut iliulaarluta pissutsinut naleqqussarluta atussavarput. Tunillatsissimasut amerlasuut ilisimavagut, taamaattumillu tunillatsissimasinnaasut amerlasuut misissornissaannut taarsiullugu, nukivut napparsimaruluttoqalernissaanut pinaveersaartitsinissamut atussavavut, Kirsten Fencker oqarpoq.

Peqqinnissaqarfimmi sulisut, nukiit misissuinermut atornagit, napparsimasunut aamma tunillatsissimallutik napparsimasunut nukiit suli annerungaartumik atussavaat.

Corona pillugu Allattoqarfiup Peqqinnissaqarfiullu suleqatigiillutik nunaqarfinni tamani pissutsinik alapernaarsuisussanik attaveqatigiinnik pilersitsipput, inuttaasullu napparsimasut eqqortumik katsorsarneqarnissaat qulakkiissavaat. Tamatuma saniatigut Peqqinnissaqarfik Upernavimmi peqqinnissakkut sullisineq qanoq pitsaanerpaamik iliuuseqarfigisinnaanerlugu misissorpaat.

- Misilittakkatta takutippaat, nunaqarfinni illoqarfinnilu minnerni tuniluunneq sukkanerusumik unittartoq. Upernavimmi innuttaasut errortorluartarnissamut, qanillinaveersaarnissamut katersuuttunullu ornigunnaveersaarnissamut innersuussutit malikkunikkit, juullilernerani angallanneq eqqugaavallaarnavianngilaq, taama oqarpoq Kirsten Fencker.