Upernavik: Meeqqat sakialluummut misissorneqassapput
Meeqqerivimmi sulisoq sakialluuteqarnera paasineqareersoq meeqqat 20-it missaanniittut sakialluummut misissorneqarput
- Ulluunerani paaqqinnittarfimmi sakialluummik eqqugaasoqarsimanera pissutigalugu suliaqartoqarnera uppernarsarsinnaavara. Inersimasoq sakialluummik nappaateqartoq paasineqarpoq. Allat sakialluummut tunillatsissimanersut maanna misissorneqarpoq.
Nakorsaaneq Henrik L. Hansen Sermitsiaq.AG-mut oqarpoq. Suliaq suli ingerlasoq ilisimatitsissutigaa.
- Meeqqerivimmi sulisoq qanga sakialluummik nappaateqarnera paasineqarpa?
- Ukiup aallartinnerani paasineqarpoq, Henrik L. Hansen akivoq.
Misissuinerit inerneri utaqqimaarneqarpoq
Tamanna pissutigalugu meeqqerivimmi meeqqat 20-it missaanniittut sakialluummut tunillatsissimanersut maanna misissuiffigineqarlunilu paasiniarneqassaaq.
- Misissuineq sapaatit akunnerini arlaqartuni ingerlanneqassaaq, misissuinerillu Nuummut nassiunneqassallutik. Aammik misissuisoqassaaq, tassani sakialluummik tunillatsissimanersut misissorneqassalluni. Tunillatsittoqarsimappat, tunillatsittut ilaannikkut ingerlaannaq napparsimalerneq ajorput - taamaattoq tunillatsittoqarsimappat nakorsartinnissamik periarfissinneqassapput, Henrik L. Hansen oqarpoq.
Misissuinerit marsip ingerlanerani paasineqarnissaat naatsorssutigineqarpoq.