Upernavik: Innuttasut misissortikkusukkaluarlutik itigartinneqartartut misigsimasut
Upernavimmi innuttaasut covid-19-imut misissortinniarlutik peqqissaavimmut saaffiginnikkaagamik itigartinneqartartutut misigisarsimapput. Innuttaasunik ingerlaavartumik misissuisarpugut, Avannaata peqqissaaviani nakorsaq Peter Vedsted erseqqissaavoq.
Upernavimmi ulluni makkunani tunillatsissimasinnaasunik ujaasisoqarlunilu qanigisaasunik arlalinnik misissuisoqaleruttorpoq. Maannakkorpiaq innuttaasut marluk assigiinngitsunik pissuteqartumik peqqissaavimmi uninngasut tulinnatsissimasuupput. Angut ataaseq allamik pssuteqarluni uninngasoq kingusinnerusukkut coronamik tunillatsissimasoq toqukkut qimagussimavoq.
Innuttaasulli arlallit malunniuteqarnertik pissutigalugu coronavirusimut misissortinniarlutik saaffiginnikkaangamik peqqissaavimmit itigartinneqartutut misigisarsimapput.
- Arlallit nalunngisakka misissortinniarlutik peqqissavimmut saaffiginnissimasut itigartinneqartarsimapput, oqarfigineqarlutik Upernavimmi tuniluuttoqanngitsoq, Anne Louise Mattaaq Mørch Sermitsiaq.AG-mut oqarpoq.
Taanna toqusimasumut ilaqutaavoq aamma uninngasumut allamut maanna coronavirusimik tunillatsissimasumut ilaqutaalluni. Unitsinneqarsimasut coronavirusi pissutigalugu unitsinneqarsimanngillat, unitsinneqarneranniilli qaammat ataaseq qaangiuttoq tunillatsissimasut paasineqarsimalluni.
Tikereernermi itigartinneqarsiimasoq
Nivi L. Bidstrup innuttaasut coronavirusimut misissortinniarlutik piffissamik inniminniiniarlutik saaffiginninnerminni itigartinneqarsimasut ilagaat. Taassuma Sermitsiaq.AG-mut oqaluttuaraa, Danmarkimiit tikinnermi kingorna ullut qulit 14-illu akornanni coronavirusimik tunillatsissimanermut eqqaanartunik malugisaqartalersimalluni.
- Peqqissaavimmi sulisunit oqaluttuunneqarpunga, Upernavimmi coronavirusi tuniluutinngimmat misissuisoqarneq ajortoq, oqarfigineqarpungalu ippigisannut atatillugu Danmarkimiit tikissimanera ungasippallaartoq, Nivi L. Bidstrup oqaluttuarpoq.
Avannaata peqqinnissaqarfiani nakorsap Peter Vedstedip oqaatigaa, innuttaasunik malunniutilinnik misissuinissamut peqqinnissaqarfik itigartitsineq ajortoq. Upernavimmi PCR atorlugu misissuisoqartarpoq, illoqarfimmi aamma misissueqqissaarnissamut atortoqarnerarpaa, taamaammat inuit ajornanngitsuaqqamik misissorneqarsinnaanerarlugit. Sulisulli sunniuteqarnerusumik atorsinnaaniarlugit piffissani aalajangersimasuni misissugassanik tigusisoqarlunilu misissueqqissaartoqartartoq oqaatigalugu.
- Innuttaasut ilaat unnukkut imaluunniit aallarnissartik aqaguttoq misissortikkumasarput, peqqissaavimmi sulisut ikiuussinnaannatik oqartartariaqartarlutik. Upernavimmi ingerlaavartumik misissuisarpugut, inuillu ippigisallit misissortarlutigit, misissuissaguttali piffissamik inniminniisoqartariaqarpoq, aamma misissortinnissamut ullut marlussuit angerlarsimaqqaartoqartariaqarpoq, Peter Vedsted nassuiaavoq.
Pinaveersaartitsisoqarnissaanik piumasaqarneq
Anine Louise Mattaaq Mørch ilaquttanilu sisamanngormat coronavirusimut misissortissimapput, tunillatsissimasunut qanigisaangamik. Suli misissortinnatik uninngasoq ilaqutaasunit pulaarneqartarsimavoq, taamalu nalusaminnik tunillatsissimasinnaallutik.
- Innuttaasut Covid-19-imut misissorneqarsinnaasannginnerat, aatsaallu tunillatsittoqaraangat misissuisoqalertarnera annernarpoq. Innuttaasut ippigisaqarnerani misissuisoqartarsimasuuppat immaqa tuniluuttoqassanngikkaluarpoq, Anine Louise Mattaaq Mørch oqarpoq.
- Ilaquttavut ilungersunartumik misigisaqartarsimapput. Neriuutiginaraluarpoq uninngasut perulunneranni ilaqutaasut pulaarsinnaatitaanissaat, taanna oqarpoq.
Peter Vedstedip erseqqissaassutigaa, sulisut Upernavimmi tunillaassuisoqarnera annikillisinniarlugu suliaqartut. Tunillaassuisoqarnerali pinngitsoortikkuminaatsoq.
- Soorunami ilaqutaasut asasatik napparsimasut ilagerusukkaat paasilluarsinnaavara. Eqqaamassavarpulli coronavirusi ulorianarlunilu tuniluutipallassinnaasoq, taammaammat uninngasut coronavirusillit pulaarneqartannginnissaat inassutigaarput, Peter Vedsted oqarpoq.
Taassuma nassuiaatigaa, immikkut ajorluinnartumik pisoqartillugu qaniginerpaasatut ilaqutaasut pulaarsinnaanerannut peqqinnissaqarfik ikiuussinnaasoq. Taamatut pisoqartillugu nuliaasoq uisorluunniit pulaartinneqarsinnaavoq, pulaartitsinermilu immikkut ittumik illersuutaasartut aamma atortinneqartarlutik.