Upernavik: Akiuussusersorneqarnissamut periarfissaq kingulleq
Coronamut akiuussusersorneqarnissamut kapitinnissamut Upernavimmi arfininngorpat periarfissaq kingulliussasoq, Naalakkersuisut allapput.
Upernavimmi innuttaasut affaasa naammassillutik akiuussusersorneqarsimagaluartut, 78 procentiillu siullermik kapineqareersimagaluartut suli akiuussusersorneqartussanik amigaateqartoqarpoq.
- Qujanartumik Upernavimmi innuttaasut amerlanerpaat akiuussutissamik kapitereerput, sulili procentimininnguit amigaatigaagut ukiamut tuniluuttoqarnissaa pinaveersaartinnissaanut innuttaasut illersorniarlugit, taamaattumik akiuussutissamik kapitinnissamut amigaateqartut tamaasa takkunnissaannut kaammattorusuppakka, Nunatta nakorsaa Henrik L. Hansen oqarpoq.
Siullermeerlutik kapitittussat aappassaanillu akiuussusersorneqartussat arfininngorpat nalunaaqutaq 18.45-miit 20.30-ip tungaanut Upernaviup peqqissaaviani kapitikkiartorsinnaapput. Akiuussutissaq Moderna atorlugu kapuuisoqassaaq.
Angalasussanit soqutigineqarluartoq
Kapuuisartut sinerissami angalasut maluginiarsimavaat innuttaasut angalasussat, taamalu akiuussusersimanermut pas-imik pisariaqartitsisut, akiuussutissamik kapitinnissaminnut soqutiginninnerusut, Nunatta nakorsaali malillugu angalanissamut pilersaaruteqanngikkaluarluni neqeroorummik akuersinissaq pissutissaqarluarpoq.
- Akiuussutissat angalasunuinnaanngillat. Akiuussutissamik pisariaqartitsineq naatsorsuutigisamit annertoorujussuusoq paasivarput. Maanna Europami Coronap allannguutaa Delta tuniluuttoq ima tuniluutiatigaaq allaat Kalaallit Nunaannut takkutinnginnissaa piviusorsiunngitsutut taaneqarsinnaalluni. Immitsinnut illersorniarutta illersuutigisinnaasatuagut tassaapput akiuussutissat, Henrik L. Hansen oqarpoq.