Upernavik unammillerfiulersoq

Polar Seafood Upernavimmi qaleralinnut atatillugu Royal Greenlandimut unammillilerpoq.

- Naatsumik oqaatigissavara taavani ikinnguterpassuaqarama, taakkualu pilersaarutivut ilassilluarsimavaat, Jens Salling, Polar Seafoodimik Kalaallit Nunaanni ingerlatseqatigiiffiit namminersortut annersaannik piginneqataasoq pisortaanerusorlu, oqarpoq. Jens Salling Upernavik Seafood aqqutigalugu Upernavimmi qaleralinniarnermik siusinnerusukkut isumaginnittuusimavoq taamanilu Jens Andersenimik suleqateqarsimalluni

Polar Seafoodip suliffissualiorneq naammassippat oktobarip naanerani Upernavimmi qaleralinnik tunisinermik ammaassinissaa ilimagineqarpoq. Taamaalillutik Royal Greenland suliffeqarfiutaatalu Arctic Fish Greenlandip qaleralinnut atatillugu piffissami aggersumi sakkortuumik unammillerneqarnissartik naatsorsuutigisinnaavaat, Sermitsiaq allappoq.

Polar Seafoodip aalisakkerivittaava qaleralinnik ullormut 20 aamma 25 tonsit akornanni tunisassiornikkut naammassisinnaasaqarpoq, qerititsivialu qaleralinnik tunisassiassanik qerisunik 600 tonsit angullugit imaqarsinnaalluni. Aalisakkeriviup tunisassirnerup qanoq ingerlanera apeqqutaatilllugu inunnut 30-nut suliffissaqartitsinissaa naatsorsuutigineqarpoq. Aalisakkerivimmi sulisartut aasaanerani aamma amerlanerusinnaassapput.

– Unammillerneq ajornartorsiutitut isiginngilarput. Avannaani aalisakkerivinnik amerliliiginnassaagut. Siumoortumik oqaatiginninnissaq soorunami ajornakusoorpoq, kisianni ineriartorneq malittarissavarput tamannalu tunngavigalugu iliuuseqassalluta, Jens Salling, Polar Seafood A/S-imi Kalaallit Nunaanni ingerlatsiviit namminersortunit pigineqartut annersaanni piginneqataallunilu pisortaanerusoq, Sermitsiamut oqarpoq.

Allaaserineqartoq aviisimi Sermitsiami, sapaatip akunnerani matumani saqqummersumi, tamakkiisumik atuarneqarsinnaavoq. Aviisi uani pisiariuk:

Powered by Labrador CMS