Upernavik Tasiusarlu: Kaffesoriarsimasut mattusimaqquneqarput
Upernavimmi tuniluuttoqarnera ilimanaateqarluinnarpoq. Nunatta nakorsaaneqarfiata ulluni aalajangersimasuni kaffellernernut nereqatigiinnernullu qaasimasut mattusimaqqullugit kaammattorpai.
Upernavimmi arlaqartut tunillanneqarsimanertik suli paasinagu, tunillaasinnaalereersimallutilli kaffillertuniissimapput.
Nunatta Nakorsaaneqarfiata tunillatsissimasut qanigisaannik misissuileruttortoq taama nalunaaruteqarpoq. Upernavimmi tunillatsissimasut paasineqareersut maanna sisamaapput. Nuummi tunillatsissimasoq ataaseq aamma Upernavimmi tunillatsissimanissaa ilimagineqarpoq.
Kaffisoriarsimasut mattusimaqquneqarput
- Akuusut amerlassusii ima amerlatigisimapput tamatumani Coronamut allatseqarfimmit inuit ataasiakkaat paasiniarnissai attaviginissaalu ajornarsimalluni, nunatta nakorsaaneqarfiat tusagassiorfinnut nalunaaruteqarluni allappoq.
Ulluni aalajangersimasuni kaffellernernut, katittunut nereqatigiinnernullu qaasimasut tamarmik mattusimaqquneqarput, mattusimalernermiillu ullut arfineq-aappassaanni misissorteqquneqarlutik.
Qaasaaffiit uku pineqarput:
- 15. juli – Kaffillerneq nereqatigiinnerlu, Tasiusami.
- 17. juli – Katittut kaffillernerat, Upernavimmi.
- 20. juli – Kaffillerneq, Upernavimmi.
- 21. juli – Kaffellerneq, Upernavimmi.
- Nakorsaaneqarfimmit taamatut iliuuseqarneq amerlasuunut eqquinissaa ilisimaneqarpoq, kisianni Upernavimmi tuniluunneq siaruatsaalineqassappat angerlarsimaannarnissamik kaammattuut tamanit malinneqarnissaa pisariaqarpoq.
Upernavimmi misissuinissat
Upernavimmi misissortinnissamik neqerooruteqartoqarpoq Peqqinnissaqarfimmut piffissamik inniminniinikkut uunga: 96 49 13.
Qanimut attaveqarsimasut immikkut maluginiassavaat Covid-19-ip ersiutaanik peqalernissartik, tunillatsisimasumut attaveqarsimanermiit ullut 14-it angullugit tamanna eqqumaffigineqassaaq. Mianersortuarnissaq pisariaqarpoq aamma ersiutaasinnaasut pillugit eqqumaffiginninnissaq, naak ullut 7-issaani misissortinnermi negativiusimagaluaraanniluunniit.
Innuttaasut maleruaqqusanik eqqaasinneqarput:
- Napparsimaguit angerlarsimaannarit misissortillutillu
- Assatit asakulakkit imaluunniit håndsprit atoruk
- Talivit peqiffianut tangajorit quersorilluunniit
- Assannik eqitsinaveersaarit, kuniuinaveersaarit pakkussinaveersaarillu – qanillilluni attaveqarneq killilersimaaru
- Eqqiluisaarnissat eqqumaffigiuk – angerlarsimaffimmi suliffimmilu
- Qanillinaveersaarit allallu mianersoqqullugit