Upernavik Seafood: Taamaammat akinik appaavugut

Upernavimmi unammilleqatigiittoqarnerani qalerallit qaffasippallaamik inissinneqarsimanerat Upernavik Seafoodimit oqaatigineqarpoq. Unammilleqatigiittoqaqqilissagaluarpat akinik qaffaasoqaqqissinnaasoq oqaatigineqarpoq. Suliffeqarfik Royal Greenlandimit Polar Seafoodimiillu pigineqarpoq.

Qaleralinnik tunitsivinni Upernavimmi unammilleqatigiittoqaraluarpoq, tassani Suluk Fish Aps aamma Halibut Greenland umiarsuarnik tunitsivinnik tulaassinissamut akuerineqarmata. Unammilleqatigiittoqarallarmat qalerallit kilomut 15 koruuninit 20 koruuninut qaffanneqarpoq. Unammillertut umiarsuarmik tunitsiveqartut allamut aallarneranni akigitinneqartut appaqqinneqarput.

- Unammilleqatigiittoqarnerani akigitinneqartut atorneqartariaqanngillat unammilleqatigiittoqannginnerani, Upernavik Seafoodimi pisortaaneq Flemming Andersen Sermitsiaq.AG-imut nassuiaavoq.

Akit qaffasippallaartut
Nunaqavissut Suliffiutillit Kattuffiata taamatut aalajangerneq isumaqatiginngilaa, aalisartunut eqquisussaanera isornartorsiorneqarluni.

- Unammilleqatigiittoqarnerani qalerallit kilomut 20 koruunimik akeqartinneqarnerat annertuallaarpoq. Naak unammilleqatigiittoqarnerani aalisakkerivitsinnut tulaassisoqartarpoq, Flemming Andersen oqarpoq.

Umiarsuanut tulaassisarfiit pillugit Naalakkersuisut piumasaqaateqarnikuupput, tassani aalisakkeriviit tulaassisarnissaannut suliamut pilersaaruteqartoqarnissaa piumasaqaatigineqarluni. Suluk Fish Aps aamma Halibut Greenland Upernavimmut siunissami uteqqikkumaajunnarsissapput tassanilu unammilleqatigiinneq attanneqaqqilissalluni.

- Unammilleqatigiittoqaqqilissappat imaassinnaavoq akinik qaffaaqqittugut. Royal Greenland aamma KNAPK isumaqatigiissuteqarfigereerpagut Uummannap sulluani qanoq akeqartitsissanerluta, tassanimi qalerallit kilomut 15 koruuneqarput. Uummannami Upernavimmilu aalisartunut assigiimmik akeqartitsivugut, Flemming Andersen oqarpoq.