Upernavik Kujallermi tunisassiorfimmik sannaartornissaq 2021-mi aallartinneqarsinnaasoq
Nunap qeriuaannartup aakkiartornera coronallu ajornartorsiortitsinera suliniummut akorngutaasimapput, Royal Greenlandilli Upernavik Kujallermi 2021-mi tunisassiorfitoqqap maannakkut inigisaani nutaamik tunisassiorfiliornissaq imaluunniit tunisassiorfitoqqap nutarterneqarsinnaanera sulissutigivaa
Royal Greenlandip nunaqarfimmi Upernavik Kujallermi aalisakkeriviliornissaq 2019-imi taamaatiinnartariaqarsimavaa. Pissutaasoq tassaalluni toqqavissamut periarfissat illersorneqarneqarsinnaasut nunaminertat nassaarinissaat ajornakusoortorujussuunerat, nunaqarfimmi nuna qeriuaannartoq aakkiartulersimammat.
Aamma Royal Greenlandip aningaasaliissutai tamarmik 2020-mi unitsikkallarneqarsimapput, ingerlatseqatigiiffik coronap ajornartorsiortitsineranit eqqugaasimammat, nunarsuarmi aalisakkanik niuerfinni akigititat appariartornerisa kingunerannik.
Maannali Royal Greenlandip 2021-imi aningaasaliissuteqarnissamut missingersuummut aalisakkeriviup atuutereersup inigisaani nutaamik aalisakkeriviliorsinnaaneq imaluunniit aalisakkeriviup nutarterneqarsinnaanera ilanngunniarlugu sulissutigaa.
Ingerlatseqatigiiffik, Naalakkersuisut aqqutigalugit Partii Naleqqameersumut Jens Napaattuumut, paragraf 37 aqqutigalugu suliniutip qanoq ingerlaneranik apeqquteqarsimasumut taamatut ilisimatitsivoq.
Otte millioner koruunit nalingannut pitsanngorsaanerit
- Aalisakkanik piniakkanillu tunisassiorfiit Nunaqarfimmiunut IlIoqarfimmiunullu uumataapput, taakkua piutinnagit piffinnni inuuniarneq ajornakusoortorujusuusarpoq, Jens Napaattooq apeqquteqarnerminut tunngavilersuilluni allappoq.
Upernavik Kujallermili aalisartut ikiorfeerutiveqqanngillat, Royal Greenland nunaqarfiup qerititsiviani inissaqartitsinerulersimammat:
- Upernavik Kujallermi maannakkut periarjfssat pitsaanerulersinniarlugit containerit arfineq-pingasut 40 fodsiusut qerititsiviit toqqorsivittut inissinneqarnikuupput. Taakku ukiisinneqarnerminni qerisut 200 tonsit missaaniittut imarisinnaavaat.
- Containeri qerititsivik aamma inissinneqarsimavoq, taamaalilluni ulluinnarni qerititsinermut piginnaasat qaffanneqarsimapput. Sumiiffimmi innaallagissamik pilersuisinnaaneq naammanngimmat containeri sarfaliuut atortuilu inissinneqarput. Taakkua pitsaanerulersitsinerit 8 millioner koruunit missiliorlugit akeqarsimapput, Royal Greenland allappoq.
Inissaqartitsilluartoq
Ingerlatseqatigiiffiup ilanngullugu ilisimatitsissutigaa, nunaqarfimmi tunisat 2020-mi annikilleriarsimasut, taamaammallu maanna qerititsiviit inissaqarluartut:
- 2020-imi ukiup affaani siullermi 144 tonsit tunineqarput 2019-imili piffissami tassani 258 tonsil tunineqarsimallutik. Sapaatip akunneranut tulaassuinerit siaruarneruniarlugit tulaassuinissamut pilersaarutit isumaqatigiissutigineqarput. Sanaartugaq (tunitsivik) ullormut 7-8 tonsinik tigusaqarsinnaavoq. Sapaatip akunneranut 25-30 tonsinik tunisaqarnissanik pisariaqartitsisoqassasoq sumiiffimmi tunitsivimmi pisortap nalilerpaa, Royal Greenland ilisimatitsivoq.
Jens Napaattuup aamma Naalakkersuisunut apeqqutigisimavaa, Kangersuatsiami aalisakkerivimmut tunngatillugu qanoq iliuuseqartoqarniarnersoq, Naalakkersuisulli tassunga tunngatillugu imatut oqarput:
- Royal Greenlandip sanaartukkat pigisani Kangersuatsiami inunnut privatinut tuninikuuai. Sanaartukkamut tassunga suliniutinut tunngasut piginnittunit nutaanit aallartinneqartariaqassapput, Naalakkersuisut Siulittaasuat Kim Kielsen ilisimatitsivoq.