Upernaakkut ataatsimiinneq: Parisimi isumaqatigiissut, inuit nalunaarsorneqartarfiat aamma hashi qulequttanut ilaapput
Inatsisartut upernaakkut ataatsimiinnissaannut oqaluuserisassat piareerput, politikerillu ilaatigut Kalaallit Nunaata Parisimi isumaqatigiissummut nangaassuteqarnini atorunnaarsissaneraa aalajangiissapput.
Inatsisartunut ilaasortat suliartorlutik upernaakkut ataatsimiinneq aallartillugu Nuummi ataatsimiinnissaannut piffissaq qalliartorpoq.
Ataatsimiinnermi oqaluuserisassat piareerput, suliassallu amerlapput. Maannamut oqaluuserisassat 40-t nutaat Inatsisartunut ilaasortaneersut, Naalakkersuisunit qulequttat 24-t kiisalu siorna ukiaanerani ataatsimiinnermit qulequttat marluk kinguartinneqartut akuerineqarput.
Kalaallit Nunaat Parisimi isumaqatigiissummut ilanngutissava
Oqaluuserisassani qulequttat arlallit saqquminikooqaat aamma piffissami sivisuumi politikkikkut oqaluuserineqarsimallutik. Assersuutigalugu Kalaallit Nunaata Parisimi isumaqatigiissummut ilanngunnissaa, 2021-mi ukiakkut Naalakkersuisut nalunaarutigeriigaat, kingorna politikkikkut ajornartorsiutigineqartoq.
Siorna IA-p naalakkersuisoqatini Naleraq Siumumik taarserpaa, Siumulli Kalaallit Nunaata isumaqatigiissummut ilanngunnerata kingunerisinnaasai paaseqqaarniarpai – tassa ilanngunneq Kalaallit Nunaanni suliffeqarfissuaqarnikkut ineriartornissamut aporfiussanersoq.
Kingunerisinnaasai pillugit annertuumik misissuisoqarnikuuvoq, suliarlu maanna upernaakkut ataatsimiinnermi oqaluuserineqassaaq, Kalaallit Nunaata nunap immikkoortuani Parisimi isumaqatigiissummut nangaassuteqarnini atorunnaarsillugu, Naalakkersuisut danskit naalakkersuisuinut nalunaaruteqarsinnaanissaat siunertarineqarluni.
Siulittaasup haship inerteqqutaajunnaarnissaa oqallisigerusuppaa
Qulequtaq alla tusagassiorfinni arlaleriarluni sammineqartoq aamma ukiumi kingullermi oqallisaangaatsiarpoq, tassa hashimik anngiortumik eqqussuineq, ilaatigut assersuutigalugu eqqussuisut timiminni hasheqarlutik toqusarnerat.
Tamatuma saniatigut politiit nalinginnaasumut sanilliullugu hashimik arsaarinnissuteqarnerusimapput, taamatut ineriartortoqarnerani Atassummi siulittaasoq Aqqalu C. Jerimiassen, haship inerteqqutaajunnaarnissaa pillugu oqallittoqarnissaanik siunnersuuteqarpoq. Siunnersuut imaappoq:
''Pisortanit aqunneqartumik cannabissip inerteqqutaajunnaartinneqarneratigut hashimik eqqussuisarnerup, eqqusseriaraluarnermi toqusoqartarnerata, hashimik unioqqutitsilluni tuniniaasarnerup tigummiaqartarnerullu kiisalu aningaasanik Kalaallit Nunaannit annissuisarnerup akiorneqarsinnaanerat pillugu apeqquteqaat aallaavigalugu oqallinnissamik siunnersuut.''
Politikerip tunngavilersuuteqarnermini ilaatigut hashi inerteqqutaanngikkaluarpat, pisortat immaqa atuinermik aqutsisinnaagaluarnerat aamma pinerluttuliortut unioqqutitsilluni tuniniaanikkut millionerpassuarnik iluanaarnissaat pinngitsoortissinnaagaat oqaatigaa.
Inuit nalunaarsorneqartarfiat pillugu aalajangiineq
Upernaakkut ataatsimiinnermi politikerit aamma Pele Brobergip inuit nalunaarsorneqarfissaannik siunnersuutaa suliarissavaat. Siunnersuut maannamut oqallinneqartarnermini aalassatsitsingaatsiartarpoq.
Nalunaarsuiffik kikkut kalaallinut inuiannut ilaanerannik erseqqissaajumalluni siunertaqarpoq, Pele Brobergillu oqarnera naapertorlugu kikkut Inatsisartunut qinersinermik kiisalu siunissami Kalaallit Nunaata naalagaaffinngornissaanut taasititsisoqarsinnaanerani taasisinnaanerannik aalajangiinermut atorneqarsinnaassaaq.
Ataatsimiinnerit saniatigut sapaatip akunneranut Naalakkersuisunut ilaasortamut apeqqarissaartoqartassaaq, 26. april partiini siuttut apeqqarissaassapput.
Ataatsimiinneq 14. april aallartissaaq, 31. maj tungaanut ingerlanneqarnissaa naatsorsuutigineqarpoq.