qaangeruminaatsoq
Uparuaat: Maangaannaq eqqaaginnartut!
– Mingutsitsinerinnavinngorsimavoq, Nuummiu Quassussuarmi pisuttuareerluni oqarpoq
Puiaasaaqqat plastikkit, sikaritsit puukui allarpassuillu pinngortitamut maangaannaq eqqakkat.
Ajoraluartumik tamanna nunatsinni pinngortitami takornartaanngilaq. Aasakkullu aputaarukkaangat takusaq tamanna nuanniitsoq ersarinnerulersarpoq.
Kim Godtfredsenip, ilaatigut arpattartutut inuusuttunillu suliniummik Timi Asimi ingerlatsisutut ilisimaneqartup inuit mingutsitsisarnerat pakatsinarteqaa.
Taanna marlunngormat ikinngutini ilagalugit Quassussuup qaavaniissimavoq.
– Amerlasuut qaqqasiorneq nuannareqaat, nuannaarunnaartarpungali nunami taama annikitsigisumi maangaannaq eqqakkanik naammattoorsigaangama. Ilami mingutsitsinerinnavinngorsimavoq. Inuit pinngortitamut pikatassuit! Kim Godtfredsen Sermitsiaq.AG-mut oqarpoq.
Qaqqap qaavani eqqaaviit?
– Minutsini qulini Quassussuup qaavani puussiamut katersuivunga, ilaatigut immiaaqqat sodavandillu puukui, taqussat puukui sikaritsikullu 150-it sinnillit.
– Mingutsitsineq kanngunaqaaq, inuillu igitassamik illoqarfimmukaallugit iginnissaat akisussaaffigaat, Kim Godtfredsen erseqqissaavoq.
Taanna aperivoq kommunip eqqarsaatigisariaqannginneraaa qaqqap qaavanut eqqaavinnik sikaritsikoorfinnillu inissiinissaq.
– Maangaannaq taama eqqaatigisoqartarmat kommuni eqqaavinnik sikaritsikoorfinnillu qaqqap qaavanut inissiisinnaagaluarpoq, taavalu inuusuttunut suliniutip Timi Asimi sapaatit akunneri tamaasa imaariartortarlugit. Soorunami kommunip akiligaanik imaluunniit aningaasaateqarfiit aningaasaligaannik, Kim Godtfredsen nassuiaavoq.
Kim Godtfredsenip apeqqutaa qanoq isumaqarfigaajuk? Illit nammineq asialaami pinngortitamiillutit egitassatit imaluunniit eqqakkat naammattuukkatit qanoq pisarpigit?
Kim Godtfredsenip qaqqami eqqakkanik katersaminik assilisaa ataani takuuk